چنئی: عالمی شہرت یافتہ موسیقار اے آر رحمان کو پانی کی کمی (ڈی ہائیڈریشن) کے باعث اتوار کی صبح چنئی کے ایک نجی اسپتال میں داخل کرایا گیا، تاہم چند گھنٹوں بعد ڈاکٹروں نے ان کی طبیعت کو تسلی بخش قرار دیتے ہوئے انہیں ڈسچارج کر دیا۔
رحمان کے منیجر سنتھل ویلین کے مطابق، 58 سالہ موسیقار اب مکمل صحتیاب ہیں اور گھر واپس پہنچ چکے ہیں۔ ان کی بہن اے آر ریحانہ نے سوشل میڈیا پر گردش کرنے والی سینے میں تکلیف کی افواہوں کو رد کرتے ہوئے وضاحت دی کہ رحمان کو محض ڈی ہائیڈریشن اور ہلکی معدے کی تکلیف ہوئی تھی۔
مداحوں کو جیسے ہی رحمان کی اسپتال میں داخلے کی اطلاع ملی، انہوں نے سوشل میڈیا پر نیک تمناؤں اور دعاؤں کے پیغامات شیئر کرنا شروع کر دیے۔ تمل ناڈو کے وزیر اعلیٰ ایم کے اسٹالن نے بھی رحمان کی صحت کے بارے میں معلومات لیں اور ان کی جلد صحتیابی کی تصدیق کی۔
دلچسپ بات یہ ہے کہ رحمان کی اہلیہ سائرہ رحمان، جنہوں نے گزشتہ سال علیحدگی کا اعلان کیا تھا، نے بھی اپنے شوہر کے لیے نیک خواہشات کا اظہار کیا۔ انہوں نے میڈیا سے درخواست کی کہ انہیں ’ایکس وائف‘ کے بجائے اب بھی رحمان کی بیوی کہا جائے۔
رحمان کے بچوں اے آر امین، خطیجہ رحمان، اور راحیمہ رحمان نے بھی سوشل میڈیا پر اسپتال کی میڈیکل رپورٹ شیئر کی، جس میں تصدیق کی گئی کہ ان کے والد کو محض معمولی طبی مسئلے کی بنا پر اسپتال لایا گیا تھا اور وہ اب بالکل ٹھیک ہیں۔
موسیقار اے آر رحمان جلد ہی اپنی نئی فلمی پروجیکٹس “لاہور 1947″، “تھگ لائف” اور “تیرے عشق میں” پر کام دوبارہ شروع کریں گے۔
