مظفر آباد۔آزاد کشمیر کے ضلع حویلی میں ایک مسافر کوچ گہری کھائی میں جا گری، جس کے نتیجے میں 5 افراد زندگی کی بازی ہار گئے جبکہ 3 زخمی ہو گئے۔
پولیس کے مطابق فارورڈ کہوٹہ سے راولپنڈی جاتے ہوئے کوچ کو محمود گلی کے مقام پر برف اور دھند کی وجہ سے حادثہ پیش آیا۔ کوچ پھسلن کے باعث ڈرائیور کے قابو سے باہر ہو کر سیکڑوں فٹ گہری کھائی میں جا گری۔
مقامی افراد اور ریسکیو ٹیموں نے جاں بحق افراد اور زخمیوں کو نکال کر قریبی آرمی اسپتال اور ایم ڈی ایس منتقل کر دیا۔
اس حادثے کی ویڈیو بھی منظر عام پر آئی ہے، جس میں دیکھا جا سکتا ہے کہ برفباری کے باعث سڑک پر پھسلن ہونے سے ڈرائیور کوچ کو کنٹرول نہ کر سکا۔
دوسری طرف، وادی لیپہ کرناہ میں محکمہ شاہرات نے برف میں پھنس جانے والی دو گاڑیوں کے مسافروں کو کامیابی سے ریسکیو کر کے محفوظ مقام پر منتقل کر دیا۔
علاقے میں تعینات فوجی دستوں نے بھی امدادی کارروائی میں بھرپور تعاون کیا۔
