بھارتی ٹیلی ویژن اور سوشل میڈیا کی مشہور شخصیت جنت زبیر نے اپنے قریبی دوست فیصل شیخ کو انسٹاگرام پر اَن فالو کردیا، جس کے بعد دونوں کے درمیان تعلقات میں دراڑ کی قیاس آرائیاں زور پکڑ گئی ہیں۔
23 سالہ جنت زبیر بھارت کی سب سے زیادہ معاوضہ لینے والی ٹی وی اداکارہ ہیں، جو ایک قسط کے 18 لاکھ روپے تک وصول کرتی ہیں۔ ان کی پیشہ ورانہ کامیابیوں کے ساتھ ساتھ، ان کی ذاتی زندگی بھی ہمیشہ مداحوں کی توجہ کا مرکز بنی رہی ہے، خاص طور پر ان کے اور ٹک ٹاک اسٹار فیصل شیخ کے تعلقات پر اکثر چہ مگوئیاں ہوتی رہی ہیں۔
تاہم، اب ایسا لگتا ہے کہ دونوں کے درمیان کچھ ناخوشگوار واقعات پیش آئے ہیں۔ جنت کے اَن فالو کرنے کے بعد، ان کے بھائی ایان زبیر اور والدہ نازنین نے بھی فیصل کو اَن فالو کردیا ہے، جبکہ دلچسپ طور پر فیصل اب بھی جنت، ان کے بھائی اور والدہ کو فالو کر رہے ہیں۔
11 مارچ 2025 کو جنت زبیر نے انسٹاگرام پر چند تصاویر شیئر کیں، جن میں وہ بغیر میک اپ کے، ایک کریمی رنگ کی شال میں ملبوس نظر آئیں۔ اگرچہ ان کے چہرے پر ہلکی سی مسکراہٹ تھی، مگر ان کے تاثرات کچھ اور ہی کہانی بیان کر رہے تھے۔ انہوں نے کیپشن میں لکھا:
“جو ہے، اسے قبول کرو۔ جو تھا، اسے چھوڑ دو۔ اور جو ہوگا، اس پر بھروسہ رکھو۔”
یہ الفاظ پڑھ کر مداحوں میں چہ مگوئیاں شروع ہوگئیں کہ شاید جنت اور فیصل کے درمیان کچھ ٹھیک نہیں چل رہا۔ کمنٹس سیکشن میں ایک صارف نے حیرانی کا اظہار کرتے ہوئے لکھا: “جنو، ایان اور آنٹی نے فیصل کو اَن فالو کر دیا ہے۔ یقین نہیں آرہا!” جب کہ ایک اور صارف نے کہا، “جنت، ابھی تو آپ کو فیصل کا ساتھ دینا چاہیے تھا۔ گرو سیلیبریٹی ماسٹر شیف کا فاتح ہے، فیصل کتنا ڈپریس ہوگا، اور آپ نے اسے چھوڑ دیا۔”
اب دیکھنا یہ ہے کہ جنت اور فیصل کی دوستی واقعی ختم ہوگئی ہے یا یہ صرف ایک غلط فہمی ہے جو جلد دور ہوجائے گی۔
