اسلام آباد ۔کوئٹہ سے پشاور جانے والی جعفر ایکسپریس پر نامعلوم حملہ آوروں نے فائرنگ کر دی، جس کے نتیجے میں ڈرائیور زخمی ہوگیا۔ دہشت گردوں نے ٹرین کو مچھ کی پہاڑیوں میں روک دیا اور مسافروں کو یرغمال بنانے کی اطلاعات سامنے آئیں۔
آج صبح ساڑھے نو بجے ٹرین کوئٹہ سے روانہ ہوئی۔ جب ٹرین پیرو گنڈالہ کے علاقے سے گزری، تو وہاں مسلح افراد نے ٹرین پر فائرنگ کر دی جس کے نتیجے میں ڈرائیور شدید زخمی ہوگیا۔ اسے فوری طور پر اسپتال منتقل کر دیا گیا۔ مسافر خوف و ہراس میں مبتلا ہیں اور علاقے میں فائرنگ کی آوازیں اب بھی سنائی دے رہی ہیں۔
عینی شاہدین اور لیویز کے مطابق، یہ فائرنگ گڈالہ اور پیرو کے درمیان ہوئی، جہاں جعفر ایکسپریس کو روک دیا گیا اور مزید فائرنگ کی اطلاعات موصول ہو رہی ہیں۔
ریلوے پولیس نے واقعے کی تصدیق کرتے ہوئے کہا کہ ٹرین وہیں روک دی گئی ہے۔ ٹرین میں تقریباً چھ سو سے سات سو مسافر سوار ہیں، اور زخمی مسافروں کی اطلاعات بھی موصول ہو رہی ہیں، لیکن تصدیق کا عمل جاری ہے۔
ڈی ایس ریلوے کے پی آر او نے بتایا کہ تمام اسپتالوں میں ایمرجنسی نافذ کر دی گئی ہے اور سبی سے ایمبولینسز جائے وقوع کی طرف روانہ کی گئی ہیں۔
سیکیورٹی فورسز کے مطابق، یہ واقعہ مچھ کی پہاڑیوں کے وسط میں پیش آیا، جس کا سیکیورٹی فورسز نے محاصرہ کر لیا ہے اور مزید کانوائے روانہ کر دیے گئے ہیں۔ ملزمان کے فرار ہونے کی فی الحال کوئی اطلاعات نہیں ہیں، بلکہ یہ خبریں ہیں کہ ملزمان نے مسافروں کو یرغمال بنا لیا ہے اور علاقے میں وقفے وقفے سے فائرنگ کا سلسلہ جاری ہے۔
