اسلام آباد ۔پی ٹی آئی کے رہنما سلمان اکرم راجا نے وزیر اعظم کے مشیر پرویز خٹک پر طنز کرتے ہوئے کہا کہ جھوٹ، فریب اور مکر کی حکومت میں پرویز خٹک جیسے لوگ ہی آئیں گے۔
اسلام آباد ہائی کورٹ کے باہر میڈیا سے گفتگو کرتے ہوئے پی ٹی آئی کے رہنما اور وکیل سلمان اکرم راجا نے کہا کہ بانی پی ٹی آئی سے ملاقاتیں نہیں کرائی جاتیں، جبکہ عمران خان کی ہفتہ وار دو ملاقاتیں آئینی حق ہیں اور اس کے لیے عدالتی حکم بھی موجود ہے۔ انہوں نے کہا کہ ہمارے لوگوں کو گرفتار کرنے کی کوششیں کی جا رہی ہیں۔
سلمان اکرم راجا نے مزید کہا کہ فارم 47 پر شیر افضل مروت کے بیان پر وہ کوئی تبصرہ نہیں کریں گے کیونکہ شیر افضل مروت کی پارٹی ممبر شپ کا فیصلہ بانی پی ٹی آئی ہی کریں گے۔ انہوں نے یہ بھی کہا کہ سب کو معلوم ہے کہ فارم 47 پر کون جیتا ہے۔
انہوں نے کہا کہ حکومت کو الیکشن سے متعلق رپورٹ اور صحافیوں کی آزادی برداشت نہیں ہو رہی۔ سرور باری کے گھر اور دفتر پر حملہ کیا گیا۔ یہ دور جھوٹے بیانیے اور جبر کا ہے، لیکن ہم اس جبر کے خلاف لڑتے رہیں گے۔
پی ٹی آئی رہنما نے کہا کہ 26 نومبر کے حوالے سے ہمارے پاس بہت مواد موجود ہے، مگر اس وقت عدالتی صورتحال آئیڈیل نہیں ہے، اس لیے ہم حکمت عملی کے تحت آگے بڑھ رہے ہیں۔
