بھارتی اداکارہ صبا آزاد اور ہریتک روشن کو بی ٹاؤن کے سب سے خوبصورت جوڑوں میں شمار کیا جاتا ہے، تاہم صبا کو اکثر ہریتک کو ڈیٹ کرنے پر ٹرولنگ کا سامنا کرنا پڑتا ہے۔
لیکن اس مرتبہ صبا آزاد نے خاموشی توڑتے ہوئے ناقدین کو کرارا جواب دے دیا ہے۔ اداکارہ و گلوکارہ کا کہنا ہے کہ انہیں اب یہ آن لائن تبصرے پریشان نہیں کرتے۔
ایک حالیہ انٹرویو میں صبا آزاد نے کہا، “جیسے جیسے لوگوں کا عدم اطمینان بڑھتا ہے، ویسے ویسے آن لائن اس قسم کا رویہ بھی بڑھتا ہے۔ اگر آپ خوش مزاج انسان ہیں تو آپ جعلی اکاؤنٹس نہیں بنائیں گے اور لوگوں کو ٹرول نہیں کریں گے۔ میں کیوں کسی ایسے شخص کی پرواہ کروں گی، جس کا میں چہرہ نہیں جانتی اور جو بے نام ہے، اور اپنی زندگی سے مایوس ہے۔”
صبا آزاد نے مزید کہا کہ آن لائن ٹرولنگ شروع میں انہیں پریشان کرتی تھی، لیکن اب وہ اس کا اثر خود پر نہیں ہونے دیتیں۔
اداکارہ نے کہا، “شروع میں ایسا تھا کہ ان باتوں کا مجھ پر اثر ہورہا تھا اور میں پریشان رہنے لگی تھی، مگر اب مجھے لگتا ہے کہ مجھے اس سے کوئی فرق نہیں پڑتا کہ ایسے لوگ میرے بارے میں اب کیا کہتے ہیں۔”
یاد رہے کہ ہریتک روشن اور صبا آزاد نے 2022 میں اپنے رشتے کو باضابطہ طور پر میڈیا میں تسلیم کیا تھا جب وہ کرن جوہر کی 50 ویں سالگرہ کی تقریب میں ایک ساتھ نظر آئے تھے۔
اس سے قبل ہریتک روشن کی شادی سوزین خان سے ہوئی تھی۔ دونوں نے 2000 میں شادی کی تھی لیکن 2014 میں الگ ہو گئے۔ ہریتک اور سوزین کے دو بیٹے، ہریان اور ہردان روشن بھی ہیں۔
