نئی دہلی ۔بھارتی کرکٹر یوزویندر چاہل اور ان کی اہلیہ، مشہور ڈانسر اور یوٹیوبر دھناشری ورما کے درمیان علیحدگی کی اصل وجہ سامنے آ گئی ہے۔
دونوں کے درمیان طلاق کی خبریں کافی عرصے سے گردش کر رہی تھیں، اور اب یہ تصدیق ہو چکی ہے کہ وہ قانونی طور پر اپنی شادی ختم کرنا چاہتے ہیں۔
بھارتی میڈیا رپورٹس کے مطابق، یہ جوڑا ممبئی کی ایک عدالت میں طلاق کے معاملے پر قانونی کارروائی مکمل کرنے کے لیے پیش ہوا۔ سماعت کے دوران، دھناشری اور چاہل نے اعتراف کیا کہ وہ گزشتہ 18 ماہ سے ایک دوسرے سے الگ رہ رہے ہیں۔ جب عدالت نے طلاق کی وجوہات پوچھی تو انہوں نے بتایا کہ ان کے درمیان ہم آہنگی کے مسائل تھے، جس کے باعث وہ مزید ساتھ نہیں رہ سکتے۔
حال ہی میں رپورٹس سامنے آئی تھیں کہ دھناشری ورما اور یوزویندر چاہل نے اپنی طلاق کو حتمی شکل دے دی ہے، تاہم، دھناشری کے وکیل نے ان خبروں کی تردید کرتے ہوئے کہا کہ قانونی کارروائی ابھی مکمل نہیں ہوئی۔
وکیل کا کہنا تھا کہ یہ معاملہ عدالت میں زیر غور ہے، اس پر کسی حتمی فیصلے سے پہلے تبصرہ نہیں کیا جا سکتا۔ انہوں نے میڈیا سے گزارش کی کہ تصدیق شدہ حقائق کے بغیر افواہیں نہ پھیلائی جائیں کیونکہ کئی غلط معلومات گردش کر رہی ہیں۔
واضح رہے کہ دھناشری ورما ایک معروف کوریوگرافر اور یوٹیوبر ہیں، جبکہ یوزویندر چاہل بھارتی کرکٹ ٹیم کے نمایاں اسپن بولر ہیں۔ دونوں نے 2020 میں شادی کی تھی، تاہم اب ان کے راستے جدا ہو رہے ہیں۔
