اسلام آباد۔وفاقی حکومت کی جانب سے ملازمت پیشہ طبقے پر ٹیکسوں کے بوجھ میں مزید اضافے کا امکان ہے، اور رواں مالی سال 2024-25 میں تنخواہ دار طبقے سے مجموعی طور پر 570 ارب روپے ٹیکس وصولی کا امکان ہے۔
رپورٹ کے مطابق، اس طرح تنخواہ دار طبقہ گزشتہ سال کے مقابلے میں 55 فیصد زیادہ ٹیکس ادا کرے گا۔
ایف بی آر کے مطابق، گزشتہ سال تنخواہ دار طبقے نے 368 ارب روپے ٹیکس خزانے میں جمع کرایا تھا، جبکہ رواں مالی سال کے پہلے 6 ماہ میں 243 ارب روپے وصول کیے گئے۔
بیان کے مطابق، پچھلے سال کے پہلے 6 ماہ کے مقابلے میں ملازمین سے 300 فیصد زیادہ ٹیکس وصول کیے گئے ہیں۔
ایف بی آر کے مطابق، پانچ سال پہلے تنخواہ دار طبقے سے سالانہ ٹیکس وصولی 129 ارب روپے تھی۔ سال 2019-20 میں 129 ارب، 2020-21 میں 152 ارب اور 2021-22 میں ٹیکس وصولی بڑھ کر 189 ارب ہوگئی تھی۔
رپورٹ کے مطابق، 2022-23 میں ملازمت پیشہ طبقے سے 264 ارب روپے وصول کیے گئے، اور اب تنخواہ دار طبقہ ٹیکس دینے والا تیسرا بڑا شعبہ بن چکا ہے۔
