برطانیہ کے مشہور راک بینڈ کولڈ پلے نے بھارت میں اپنے حالیہ کنسرٹس کے دوران ایک نیا عالمی ریکارڈ قائم کیا ہے۔ بھارتی میڈیا کے مطابق، کولڈ پلے کے بھارت میں ہونے والے کنسرٹس میں تقریباً ایک کروڑ تین لاکھ لوگوں نے شرکت کی، جس کے ساتھ ہی انہوں نے سب سے زیادہ شرکا کی حاضری کا سابقہ ریکارڈ توڑ دیا۔
اس دورے میں کولڈ پلے کے کنسرٹس کے مجموعی طور پر 1 کروڑ 3 لاکھ ٹکٹس فروخت ہوئے، اور اتنے ہی شائقین نے ان میوزیکل پروگرامز میں شرکت کی۔ اس شاندار کامیابی کے بعد، کولڈ پلے کو عالمی ریکارڈ کا اعزاز حاصل ہوا، جس کا اندراج گنیز بک آف ورلڈ ریکارڈ میں کیا گیا۔ اس سے قبل مارچ 2022 میں کوسٹاریکا میں ہونے والے کنسرٹ نے سب سے زیادہ شرکا کی حاضری کا ریکارڈ قائم کیا تھا۔
کولڈ پلے نے بھارت میں اپنی ٹور کی ابتدا نوی ممبئی کے DY پاٹل اسٹیڈیم میں 18، 19 اور 21 جنوری کو تین شوز کے ساتھ کی، اور پھر احمد آباد کے نریندر مودی اسٹیڈیم میں 25 اور 26 جنوری کو دو مزید شوز کیے۔ ہر شو میں تقریباً 1 لاکھ 30 ہزار مداحوں نے شرکت کی، جس سے بینڈ کی مقبولیت میں مزید اضافہ ہوا۔
بینڈ نے اپنے بھارتی مداحوں کا شکریہ ادا کرتے ہوئے کہا، “شکریہ احمد آباد، شکریہ بھارت! ہم ان دو ہفتوں کو کبھی نہیں بھولیں گے۔ آپ کی محبت اور مہربانی ہمیشہ ہمارے دلوں میں رہے گی۔”
اس کامیاب بھارت دورے کے بعد، کولڈ پلے کا اگلا کنسرٹ اپریل میں ہانگ کانگ میں شیڈول ہے، جس کے بعد سیئول اور پھر امریکا میں مزید شوز منعقد کیے جائیں گے۔
