اسلام آباد ۔۔ بانی پی ٹی آئی اور ان کی اہلیہ بشریٰ بی بی نے 190ملین پائونڈ سکینڈل میں سزا کیخلاف اسلام آباد ہائی کورٹ میں سزا معطلی کی درخواستیں دائر کر دی ہیں۔
درخواست میں مؤقف اختیار کیا گیا ہے کہ نیب نے بدنیتی پر مبنی طریقے سے اپنے اختیارات کا غلط استعمال کیا اور نامکمل تفتیش کی بنیاد پر جلد بازی میں سزا سنائی۔ مزید کہا گیا کہ نیشنل کرائم ایجنسی (NCA) کے ساتھ کیے گئے معاہدے کا متن حاصل نہ کرنا نیب کی جانب سے تفتیشی عمل میں ہچکچاہٹ کو ظاہر کرتا ہے۔
درخواست گزاروں نے مؤقف اپنایا کہ این سی اے کے حکام کو تفتیش کا حصہ نہیں بنایا گیا اور استغاثہ مکمل شواہد پیش کرنے میں ناکام رہا۔ عدالت سے استدعا کی گئی ہے کہ 17 جنوری کو سنائی جانے والی سزا کو معطل کرتے ہوئے ضمانت پر رہائی دی جائے اور مرکزی اپیل کے حتمی فیصلے تک سزا کو معطل رکھا جائے۔
درخواست میں مزید کہا گیا کہ سزا معطلی کے بعد اپیل کی ہر سماعت میں عدالت میں پیش ہونے کی یقین دہانی کراتے ہیں۔
یہ درخواستیں بانی پی ٹی آئی عمران خان اور ان کی اہلیہ بشریٰ بی بی کی جانب سے بیرسٹر سلمان صفدر کے توسط سے اسلام آباد ہائی کورٹ میں دائر کی گئی ہیں۔
