اسلام آباد ۔موسم سرما میں بارشوں اور برف باری کی کمی کے باعث آبی ذخائر میں پانی ختم ہو گیا۔
شدید موسمیاتی تبدیلیوں کے سبب ملک بھر میں غیر معمولی موسمی حالات دیکھنے میں آ رہے ہیں۔ منگلا، تربیلا اور چشمہ ڈیم میں پانی کی قلت پیدا ہو چکی ہے، اور یہ تینوں ذخائر اپنے نچلی ترین سطح پر پہنچ چکے ہیں۔
تربیلا ریزروائر کے لیے کم از کم آپریٹنگ لیول 1402 فٹ مقرر ہے، جبکہ موجودہ پانی کی سطح 1402.09 فٹ رہ گئی ہے، جس کے نتیجے میں تربیلا میں دستیاب پانی مکمل طور پر ختم ہو چکا ہے۔ اس ڈیم میں پانی ذخیرہ کرنے کی زیادہ سے زیادہ گنجائش 1550 فٹ ہے۔
منگلا ریزروائر کا کم از کم آپریٹنگ لیول 1050 فٹ ہے، جبکہ اس وقت پانی کی سطح 1054.00 فٹ ہے۔ اس ذخیرے میں پانی ذخیرہ کرنے کی زیادہ سے زیادہ گنجائش 1242 فٹ ہے، اور آج کے دن منگلا میں صرف 0.07 ملین ایکڑ فٹ پانی باقی ہے۔
چشمہ ریزروائر کا کم از کم آپریٹنگ لیول 638.15 فٹ ہے، جبکہ اس کی موجودہ سطح 638.70 فٹ تک پہنچ چکی ہے۔ اگرچہ پانی ذخیرہ کرنے کی زیادہ سے زیادہ سطح 649 فٹ ہے، لیکن چشمہ میں آج کے دن قابل استعمال پانی مکمل ختم ہو چکا ہے۔
ڈیموں میں پانی کی سطح میں کمی کے باعث بالائی اور وسطی پنجاب میں فصلوں کو شدید نقصان پہنچنے کا اندیشہ ہے۔
