اسلام آباد: وزیراعظم شہباز شریف نے پاکستانی فٹبالر محمد ریاض کو 25 لاکھ روپے کا چیک دیا اور ان کے لیے نوکری کا انتظام بھی کر دیا۔
وزیراعظم شہباز شریف نے ہنگو سے تعلق رکھنے والے فٹ بال کے کھلاڑی محمد ریاض سے ملاقات کی اور ان کے حوصلے کی تعریف کرتے ہوئے 25 لاکھ روپے کی مالی معاونت فراہم کی۔ وزیراعظم نے محمد ریاض کو کھیل جاری رکھنے اور پاکستان میں فٹبال کے فروغ میں فعال کردار ادا کرنے کی تلقین کی۔
اس موقع پر گفتگو کرتے ہوئے وزیراعظم شہباز شریف نے کہا کہ پاکستانی نوجوان افرادی قوت ملک کا قیمتی اثاثہ ہیں اور حکومت پاکستانی کھلاڑیوں کو ہر قسم کی سہولتیں اور بین الاقوامی سطح پر مسابقت کے لیے ضروری وسائل فراہم کرنے کی کوششوں میں ہے۔
شہباز شریف نے محمد ریاض کو مخاطب کرتے ہوئے کہا کہ آپ قوم کے ہونہار کھلاڑی ہیں اور آپ کا ٹیلنٹ ضائع نہیں ہونے دیا جائے گا۔
وزیراعظم نے متعلقہ حکام کو ہدایت دی کہ محمد ریاض کو ان کی پسند کے وفاقی ادارے میں ملازمت دی جائے، اور ملک کے نامور کھلاڑیوں کو ان کی صلاحیتوں کے مطابق سرکاری اداروں میں ملازمتیں دی جائیں۔ انہوں نے کہا کہ ملک میں کھیلوں کے فروغ کے لیے اقدامات تیز کیے جائیں۔
شہباز شریف نے یہ بھی کہا کہ بین الاقوامی سطح پر پاکستان کی نمائندگی کرنے والے کھلاڑیوں کی بہبود کے لیے حکمت عملی تشکیل دی جائے تاکہ انہیں روزگار کے پائیدار مواقع فراہم کیے جا سکیں۔ انہوں نے نوجوانوں کو کھیلوں اور دیگر صحت مند سرگرمیوں میں بڑھ چڑھ کر حصہ لینے کی ترغیب دی۔
