اسلام آباد۔ اسلام آباد میں ماہ رمضان میں عوام کو اشیاء خوردونوش کی ارزاں نرخوں پر فراہمی کیلئے نگران کمیٹی کا پہلا اجلاس کنونئیر ڈاکٹر طارق فضل چوہدری کی زیر صدارت منعقد ہوا
اجلاس میں وفاقی وزیر حنیف عباسی، وفاقی سیکریڑی داخلہ خرم آغا، چیئرمین سی ڈی اے و چیف کمشنر اسلام آباد محمد علی رندھاوا، آئی جی اسلام آباد علی ناصر رضوی، ڈپٹی کمشنر اسلام آباد اور دیگر متعلقہ افسران نے شرکت کی۔
اجلاس میں رمضان ریلیف پیکج کے تحت قائم سستے بازاروں اور اسٹالز پر اشیاء خوردونوش کی ارزاں نرخوں پر عوام کو فراہمی کا تفصیلی جائزہ لیا گیا.
اجلاس کو بریفننگ دیتے ہوئے بتایا گیا کہ اسلام آباد کے مختلف سیکٹرز میں رمضان ریلیف پیکج کے تحت 5 بڑے سستے بازار اور 20 سٹالز قائم کئے گئے ہیں اور اشیاء خوردونوش کی قیمتوں کی باقاعدہ مانیٹرنگ اور کنٹرول کرنے کیلئے اسلام آباد پولیس اور ضلعی انتظامیہ کے تعاون سے مشترکہ ٹیمیں تشکیل دے دی گئی ہے. اجلاس کو بریفننگ دیتے ہوئے بتایا گیا کہ مشترکہ ٹیموں نے ابتک مختلف سستے بازاروں، اسٹورز اور سٹالز ہولڈرز کو نہ صرف جرمانے کئے بلکہ قانونی کارروائیاں کرتے ہوئے ابتک 117 افراد کو گرفتار بھی کیا جاچکا ہے.
اجلاس کو بریفننگ دیتے ہوئے بتایا گیا کہ اسلام آباد کے سستے بازاروں اور سٹالز پر اشیاء خوردونوش کی مختلف اشیاء کی قیمتیں لاہور اور راولپنڈی کے مقابلے میں نسبتاً کم ہیں اور رمضان ریلیف پیکج کے تحت قائم سستے بازاروں سمیت دیگر سٹالز پر اشیاء خوردونوش کی وافر مقدار میں فراہمی کو یقینی بنایا جارہا ہے.
اجلاس کو بتایا گیا کہ رمضان ریلیف پیکج کے تحت قائم سٹالز پر چینی 130 روپے فی کلو فروخت کی جارہی ہے. کمیٹی نے ہدایت کرتے ہوئے کہا کہ چینی کی وافر مقدار اور چینی کے سٹالز میں اضافے کو یقینی بنایا جائے اور رمضان ریلیف پیکج کے تحت قائم سستے بازاروں میں گھی، آٹا، چینی، مرغی اور انڈوں کی قیمتوں کو کم کرنے کے حوالے سے ضلعی انتظامیہ لائحہ عمل تیار کرے۔
کمیٹی نے ہدایت کی کہ اسسٹنٹ کمشنرز اور پرائس کنٹرول مجسٹریٹ کو اپنے علاقوں میں اشیاء خوردونوش کی فراہمی اور سرکاری قیمتوں پر دستیابی کو یقینی بنائیں اور ہدایت کی کہ سستے بازاروں میں نرخ ناموں کو نمایاں جگہوں پر آویزاں کیا جائے.
کمیٹی نے ہدایت کرتے ہوئے کہا کہ سرکاری قیمتوں سے زائد وصول کرنے اور ناجائز منافع خوری کرنے والوں کے خلاف سخت کارروائی عمل میں لائی جائے اور رمضان سستے بازاروں میں آنے والے صارفین کی سہولیات کو مدِنظر رکھتے ہوئے ہیلپ لائن نمبرز اور واٹس ایپ نمبر بھی شئیر کئے جائیں.
بعد ازاں نگران کمیٹی نے رمضان ریلیف پیکج کے تحت قائم سستے بازاروں اور اسٹالز کا بھی دورہ کیا اور قیمتوں کا تفصیلی جائزہ لیا.
