قومی کرکٹ ٹیم کے سابق فاسٹ بولر شعیب اختر نے سابق کپتان بابر اعظم پر کڑی تنقید کرتے ہوئے کہا کہ پاکستانی کرکٹ شائقین نے غلط کھلاڑیوں کو اپنا “ہیرو” بنا لیا ہے۔
نجی ٹی وی چینل پر گفتگو کرتے ہوئے “راولپنڈی ایکسپریس” شعیب اختر نے کہا کہ بابر اعظم کا موازنہ ویرات کوہلی سے کیا جاتا ہے، جبکہ ان کے مداح بغیر سوچے سمجھے انہیں عظیم کھلاڑیوں کی صف میں شامل کر رہے ہیں۔
شعیب اختر نے مزید کہا کہ ویرات کوہلی کا ہیرو سچن ٹنڈولکر ہے، جس نے کرکٹ کی تاریخ میں 100 سنچریاں اسکور کی ہیں، اور کوہلی اسی میراث کے نقشِ قدم پر چلنے کی کوشش کر رہے ہیں۔ تاہم، بابر اعظم کا ہیرو کون ہے؟ “ٹک ٹک”— مگر انہوں نے کسی کھلاڑی کا نام نہیں لیا۔
سابق کرکٹر نے پاکستانی شائقین سے مخاطب ہو کر کہا کہ آپ نے غلط کھلاڑیوں کو اپنا ہیرو بنایا ہے، اور یہی آپ کی سب سے بڑی غلطی ہے۔ “یہ کھلاڑی شروع سے ہی دھوکہ دے رہے تھے۔ میں پاکستان کرکٹ ٹیم پر بات بھی نہیں کرنا چاہتا، بس تنخواہ ملنے کی وجہ سے کر رہا ہوں۔ یہ وقت کا ضیاع ہے۔ میں 2001 سے یہ بگاڑ دیکھ رہا ہوں۔ میں نے ایسے کپتان دیکھے ہیں جن کا رویہ دن میں تین مرتبہ بدل جاتا تھا۔”
پاکستانی ٹیم نے ٹورنامنٹ میں پہلے نیوزی لینڈ اور پھر بھارت کے ہاتھوں شکست کھائی، جس کے نتیجے میں گرین شرٹس ایونٹ سے باہر ہوگئے۔ تاہم، پاکستان اپنا آخری گروپ میچ 27 فروری کو راولپنڈی میں بنگلہ دیش کے خلاف کھیلے گا۔
یاد رہے کہ میزبان پاکستان چیمپئنز ٹرافی سے باہر ہونے والی پہلی ٹیم بن چکا ہے۔
