آئی ایم ایف مشن کے چیف نیتھن پورٹر کی قیادت میں ایک وفد نے وزیر خزانہ و محصولات سینیٹر محمد اورنگزیب سے اپنی ابتدائی ملاقات کی۔ اس ملاقات میں آئی ایم ایف مشن کو پاکستان کی ٹیکس پالیسی اور اس میں متوقع اصلاحات کے بارے میں تفصیلی بریفنگ فراہم کی گئی۔
وزیر خزانہ محمد اورنگزیب نے آئی ایم ایف مشن کے ارکان کا خیرمقدم کیا۔ ملاقات میں وزیر مملکت برائے خزانہ علی پرویز ملک، گورنر اسٹیٹ بینک، چیئرمین ایف بی آر اور وزارت خزانہ کے اعلیٰ حکام بھی شریک تھے۔
ذرائع کے مطابق، ایف بی آر نے ٹیکس نیٹ ورک کو وسیع کرنے کے لیے ڈیجیٹلائزیشن اور مصنوعی ذہانت (اے آئی) کے استعمال کے حوالے سے اہم اقدامات پر روشنی ڈالی۔ حکام کا کہنا تھا کہ ان اقدامات کے ذریعے ریونیو کی وصولی میں نمایاں بہتری متوقع ہے۔
ایف بی آر کے ٹرانسفارمیشن پلان کے تحت نئے دفاتر کے قیام اور ادارے کی ساخت میں رائٹ سائزنگ کے عمل کی تفصیل بھی پیش کی گئی۔ اس پلان کے تحت، اِسی سال کے دوران ان لینڈ ریونیو اور کسٹمز کی 160 سے زائد آسامیاں ختم کی جا چکی ہیں۔
آئی ایم ایف مشن کو مزید بتایا گیا کہ وفاقی کابینہ نے مختلف وزارتوں اور محکموں میں ڈیڑھ لاکھ آسامیاں ختم کرنے کا فیصلہ کیا ہے۔ اس کے علاوہ، ڈائریکٹوریٹ جنرل آف انٹیلی جنس اینڈ انویسٹی گیشن کسٹمز کی تنظیم نو کی جا رہی ہے اور کسٹمز کے چار ڈائریکٹوریٹ، جن میں راولپنڈی، ملتان، حیدرآباد اور گوادر شامل ہیں، بند کر دیے گئے ہیں۔
