لاہور: پاکستان کی معروف مارننگ شو میزبان ندا یاسر نے حال ہی میں ایک ٹی وی شو کے دوران اپنے دیور دانش نواز کے ساتھ پہلی ملاقات کا دلچسپ قصہ شیئر کیا۔
سوشل میڈیا پر وائرل ہونے والے کلپ میں ندا یاسر کے ساتھ ان کے شوہر یاسر نواز، ڈائریکٹر دانش نواز، اور اداکار علی عباس بھی موجود تھے۔
ندا یاسر نے بتایا کہ جب پہلی بار ان کی دانش نواز سے ملاقات ہوئی، تو دانش نے اپنی بہن کو پیچھے ہوکر سرگوشی میں کہا تھا، “یہ تو ایشوریا رائے جیسی نہیں لگ رہی۔” ندا نے ہنستے ہوئے کہا کہ یہ بات آج بھی ان کی یادداشت میں محفوظ ہے۔
اس موقع پر دانش نواز نے مزاحیہ انداز میں کہا، “میں نے کچھ غلط نہیں کہا تھا، اور آج بھی اپنی بات پر قائم ہوں۔ اگر بھابھی کو کہیں سے بھی لگتا ہے کہ وہ ایشوریا رائے جیسی ہیں تو یہ غلط فہمی دور کرنی پڑے گی۔”
ندا نے مزید ہنستے ہوئے کہا کہ “مجھے کبھی یہ خوش فہمی نہیں رہی، لیکن پہلی ملاقات میں ہی مجھے دانش کی سرگوشیاں سنائی دے رہی تھیں۔”
