اسلام آباد ۔سابق خاتون اول اور تحریک انصاف کے بانی عمران خان کی اہلیہ، بشریٰ بی بی نے اڈیالہ جیل میں بہتر سہولیات کی عدم فراہمی پر اسلام آباد ہائی کورٹ میں درخواست دائر کر دی ہے۔
درخواست میں بشریٰ بی بی نے مؤقف اپنایا کہ وہ سابق وزیر اعظم کی اہلیہ ہونے کے ناتے وزیر اعظم ہاؤس میں مقیم رہ چکی ہیں، اور ان کے طرزِ زندگی کے مطابق انہیں قانون کے تحت معیاری سہولیات فراہم کی جانی چاہئیں۔
انہوں نے عدالت کو آگاہ کیا کہ جیل انتظامیہ کو اس حوالے سے درخواست دی گئی تھی، تاہم اڈیالہ جیل کے سپرنٹنڈنٹ نے اس پر کوئی توجہ نہیں دی۔
درخواست میں مزید کہا گیا ہے کہ چونکہ ان کے شوہر، عمران خان کو اسی جیل میں بہتر سہولیات دی جا رہی ہیں، لہٰذا انہیں بھی قانون کے مطابق وہی حق دیا جائے۔ عدالت سے استدعا کی گئی ہے کہ جیل قواعد 1978 کے تحت متعلقہ اداروں کو سہولیات فراہم کرنے کا حکم دیا جائے۔
درخواست میں وفاقی حکومت، اڈیالہ جیل کے سپرنٹنڈنٹ اور چیف کمشنر اسلام آباد کو فریق بنایا گیا ہے۔ یاد رہے کہ بشریٰ بی بی اس وقت 190 ملین پاؤنڈ کرپشن کیس میں 7 سال قید کی سزا بھگت رہی ہیں۔
