واشنگٹن: امریکی وزیر خارجہ مارک روبیو نے اعلان کیا ہے کہ جنوبی سوڈان کے تمام پاسپورٹ ہولڈرز کے امریکی ویزے فوری طور پر منسوخ کر دیے جائیں گے۔ اس فیصلے کا مقصد ان ممالک پر دباؤ ڈالنا ہے جو امریکا کے ساتھ اپنے شہریوں کی واپسی کے معاملے میں تعاون نہیں کرتے۔
مارک روبیو نے وضاحت کی کہ اگر کسی غیر ملکی شہری کو امریکا سے بے دخل کیا جائے، تو اس کا ملک اسے واپس لینے کا ذمہ دار ہوتا ہے۔ تاہم، جنوبی سوڈان کی عبوری حکومت نے اس اصول کی خلاف ورزی کی، جس کے نتیجے میں یہ سخت اقدام اٹھایا گیا۔
انہوں نے مزید کہا کہ جنوبی سوڈان کے شہریوں کو اب امریکا کے نئے ویزے بھی جاری نہیں کیے جائیں گے۔ امریکی حکام کا کہنا ہے کہ اگر جنوبی سوڈان امریکا سے مکمل تعاون کرتا ہے تو اس پالیسی پر دوبارہ غور کیا جا سکتا ہے۔
مارک روبیو کا کہنا تھا: “جنوبی سوڈان کو امریکا سے فائدے اٹھانے کا عمل بند کر دینا چاہیے اور بین الاقوامی ذمہ داریوں کو سمجھنا چاہیے۔”
