پاکستان ٹینس فیڈریشن کے صدر اور معروف کھلاڑی اعصام الحق قریشی نے کہا ہے کہ کرکٹ کے بعد ٹینس کو ملک میں دوسرا سب سے مقبول کھیل بنایا جائے گا۔
اسلام آباد میں میڈیا سے گفتگو کرتے ہوئے اعصام الحق نے بتایا کہ ڈیوس کپ ٹائی میں پاکستان کا مقابلہ پیراگوے سے ہوگا، جس کے لیے قومی ٹیم کی تیاریوں کو حتمی شکل دی جا رہی ہے۔ انہوں نے مزید کہا کہ رمضان المبارک میں پہلی بار ٹاپ پلیئرز کے درمیان ایک منفرد ٹینس ٹورنامنٹ منعقد کیا جا رہا ہے۔
اعصام الحق کے مطابق، ڈیوس کپ کے لیے قومی ٹیم ترکی میں ٹریننگ کیمپ میں حصہ لے گی، جہاں کھلاڑی اپنی صلاحیتوں کو مزید نکھاریں گے۔ انہوں نے یہ بھی بتایا کہ پاکستان کی جونیئر ٹیم ڈیوس کپ میں شاندار کارکردگی کا مظاہرہ کر رہی ہے، جبکہ سینئر ٹیم نے ترکی میں پاکستان کے لیے گولڈ میڈل جیتا ہے۔
سرینا ٹینس ماسٹر کپ کے حوالے سے بات کرتے ہوئے انہوں نے بتایا کہ یہ ٹورنامنٹ 26 مارچ تک جاری رہے گا، جس میں ٹاپ آٹھ کھلاڑی لیڈیز، مینز، اور ڈبلز کیٹیگریز میں ایک دوسرے کے مدمقابل ہوں گے۔ اس ایونٹ میں مجموعی طور پر دس لاکھ روپے کے انعامات تقسیم کیے جائیں گے۔
