آئی سی سی نے چیمپئنز ٹرافی 2025 کا آفیشل ترانہ جاری کر دیا ہے۔
یہ ترانہ آئی سی سی کے سوشل میڈیا پلیٹ فارمز پر ریلیز کیا گیا ہے اور پاکستان کے معروف گلوکار عاطف اسلم نے اسے گایا ہے۔ ایک منٹ 39 سیکنڈ پر مشتمل اس ترانے کا عنوان “جیتو بازی کھیل کے” رکھا گیا ہے، اور گانے کی ویڈیو میں چیمپئنز ٹرافی میں شامل تمام ٹیموں کے جھنڈے نمایاں کیے گئے ہیں۔
عاطف اسلم کی آواز میں پیش کیا گیا یہ ترانہ انٹرنیٹ صارفین کی جانب سے بے حد سراہا جا رہا ہے اور اسے ایک بہترین تخلیق قرار دیا جا رہا ہے۔
آئی سی سی چیمپئنز ٹرافی 19 فروری سے پاکستان میں شروع ہو رہی ہے، اور میزبان پاکستان اپنی چیمپئنز ٹرافی 2025 کی مہم کا آغاز اسی دن کراچی میں نیوزی لینڈ کے خلاف میچ سے کرے گا۔ اس کے بعد پاکستان کو 23 فروری کو دبئی میں روایتی حریف بھارت کا چیلنج درپیش ہوگا۔
چیمپئنز ٹرافی بھارتی ٹیم کی عدم شمولیت کے باعث ہائبرڈ ماڈل کے تحت کھیلی جائے گی، جہاں بھارتی ٹیم کے تمام میچز متحدہ عرب امارات میں ہوں گے۔
