کراچی۔ پاکستانی کمپنیوں نے امریکہ کی ریاست کیلیفورنیا کے شہر لاس اینجلس میں منعقدہ عالمی نمائش “ٹیکس ورلڈ” اور “اپریل سورسنگ” میں شرکت کی اور پاکستان کی ٹیکسٹائل مصنوعات میں متعارف کردہ جدت کو عالمی خریداروں کے سامنے پیش کیا۔
پاکستان کی پانچ بڑی ٹیکسٹائل کمپنیوں نے اس عالمی نمائش میں حصہ لیا، جو 13 اور 14 اگست کو منعقد ہوئی۔ اس نمائش میں ملبوسات کے ساتھ فیشن انڈسٹری کے نئے رجحانات بھی دکھائے گئے۔
نمائش میں پاکستان، امریکہ، چین، بھارت، تائیوان، اور ترکی کی 68 کمپنیوں نے شرکت کی۔ اس میں ٹیکسٹائل، ملبوسات، ایکسیسریز، اور سورسنگ ریسورسز پیش کیے گئے۔
نمائش میں شامل پاکستانی کمپنیوں کے نمائندوں نے بتایا کہ پاکستانی مصنوعات نے خریداروں کی خاص توجہ حاصل کی اور نمائش نے پاکستان کی صنعت میں ہونے والی جدید تبدیلیوں کو عالمی سطح پر متعارف کرانے میں مدد فراہم کی۔
پاکستانی کمپنیوں کا کہنا ہے کہ اس نمائش سے نئے کاروباری روابط قائم ہوئے ہیں، جو پاکستان کی برآمدات بڑھانے میں معاون ثابت ہوں گے۔