کراچی : پاکستانی فلم انڈسٹری کی صفِ اول کے اداکار اور پروڈیوسر ہمایوں سعید نے اپنی حالیہ فلم “لو گرو” کی غیر متوقع کامیابی پر خوشی کا اظہار کرتے ہوئے دو نئی فلموں کی تیاری کا اعلان کر دیا ہے۔ انہوں نے کراچی پریس کلب میں میڈیا سے گفتگو کرتے ہوئے بتایا کہ فلم نے صرف ایک دن میں 5 کروڑ روپے کا بزنس کر کے تمام توقعات کو پیچھے چھوڑ دیا۔
ہمایوں سعید کا کہنا تھا کہ انہیں یقین نہیں تھا کہ “لو گرو” کو اتنا زبردست ردعمل ملے گا۔ ان کے بقول، فلم کی مقبولیت نے ثابت کر دیا ہے کہ پاکستانی سینما کی بحالی کا وقت آ چکا ہے۔ اسی کامیابی کے تسلسل کو آگے بڑھاتے ہوئے انہوں نے اعلان کیا کہ “لو گرو 2” پر بہت جلد کام شروع کیا جائے گا، جب کہ سپر ہٹ سیریز “جوانی پھر نہیں آنی” کا تیسرا حصہ “جوانی پھر نہیں آنی 3” آئندہ برس نمائش کے لیے پیش کیا جائے گا۔
ہمایوں سعید نے اس موقع پر پاکستان میں فلم انڈسٹری کی ترقی کے لیے مزید سینما گھروں کی تعمیر کو ناگزیر قرار دیا۔ ان کا کہنا تھا کہ فلمی ثقافت کو فروغ دینے کے لیے حکومت اور نجی شعبے کو مل کر اقدامات کرنے ہوں گے تاکہ شائقین کو اعلیٰ معیار کی تفریح مہیا کی جا سکے۔انہوں نے پاکستانی فلم بینوں کا شکریہ ادا کرتے ہوئے کہا کہ عوام کی محبت ہی اصل طاقت ہے جو انہیں بار بار نئے پراجیکٹس کی طرف لے کر آتی ہے۔
فلم “لو گرو” کی شاندار کامیابی کے بعد ہمایوں سعید کی نئی فلموں کا اعلان پاکستانی فلم انڈسٹری کے لیے ایک خوش آئند پیش رفت قرار دیا جا رہا ہے۔
