اسلام آباد میں سرکاری ملازمین کا تنخواہوں میں اضافے کیلئے احتجاج، ریڈ زون سیل

اسلام آباد :  وفاقی دارالحکومت میں سرکاری ملازمین نے اپنی تنخواہوں میں مہنگائی کے تناسب سے اضافے کا مطالبہ کرتے ہوئے احتجاج کا آغاز کر دیا ہے۔ مظاہرین کی بڑی تعداد شاہراہ دستور پر جمع ہے جہاں وہ حکومت سے اپنی تنخواہوں میں خاطر خواہ اضافے کا مطالبہ کر رہے ہیں۔

احتجاج کے پیش نظر  ریڈ زون کے تمام داخلی راستوں کو پولیس کی بھاری نفری نے بند کر دیا ہے۔ شاہراہ دستور پر پولیس کی بھاری نفری تعینات کی گئی ہے تاکہ کسی بھی ناخوشگوار واقعے سے بچا جا سکے۔

راستے بند ہونے کے باعث شہریوں کو شدید مشکلات کا سامنا کرنا پڑ رہا ہے۔ ریڈ زون کے داخلی راستوں پر گاڑیوں کی لمبی قطاریں لگ گئی ہیں  جس سے ٹریفک کا نظام درہم برہم ہو گیا ہے۔ شہریوں کو اپنے دفاتر اور دیگر مقامات تک پہنچنے میں دشواری کا سامنا ہے۔ مظاہرین نے اعلان کیا ہے کہ جب تک ان کے مطالبات پورے نہیں ہوتے، احتجاج جاری رہے گا۔