نان فائلرز اور ٹیکس چوروں کے گرد شکنجہ سخت، سفری و مالی پابندیاں متوقع

اسلام آباد  :  وفاقی حکومت نے آئندہ مالی سال کے بجٹ میں ٹیکس نیٹ کو وسعت دینے اور ٹیکس چوروں و نان فائلرز کے خلاف سخت اقدامات اٹھانے کی تیاریاں مکمل کر لی ہیں۔ ذرائع کے مطابق بجٹ 2025-26 میں متعدد سخت پابندیاں اور بھاری جرمانے تجویز کیے گئے ہیں، جن کا مقصد غیر دستاویزی معیشت کا خاتمہ اور ٹیکس وصولیوں میں اضافہ ہے۔

ذرائع کے مطابق:

• نان فائلرز پر بیرون ملک سفری پابندی عائد کرنے کی تجویز ہے۔

• صرف زیارات کے مقصد سے بیرون ملک جانے کی اجازت دی جائے گی۔

• دیگر تمام اقسام کے بیرون ملک سفر پر پابندی ہوگی۔

حکومت نے نان فائلرز پر درج ذیل مالی و تجارتی سرگرمیوں کی روک تھام پر غور شروع کر دیا ہے:

• گاڑیوں اور جائیداد کی خریداری پر پابندی برقرار رہے گی۔

• مالی لین دین (بینک ٹرانزیکشنز) پر قدغن۔

• شیئرز کی خریداری اور میوچل فنڈز میں سرمایہ کاری پر بھی پابندی عائد کی جائے گی۔

بینک سے رقم نکالنے پر ٹیکس میں اضافہ

• نان فائلرز کے لیے بینک سے کیش نکلوانے پر ودہولڈنگ ٹیکس کی شرح دگنی کرنے کی تجویز ہے۔

• موجودہ شرح 0.6 فیصد سے بڑھا کر 1.2 فیصد کیے جانے کا امکان ہے۔

• ہر 50 ہزار روپے نکلوانے پر ٹیکس کا اطلاق ہوگا۔

کمیونیکیشن سروسز پر نرمی

• موبائل فون سمز اور انٹرنیٹ ڈیوائسز بلاک کرنے کی پالیسی تبدیل کر دی گئی ہے۔

• نان فائلرز کی کمیونیکیشن سہولیات جاری رہیں گی، تاکہ صارفین کی بنیادی رسائی متاثر نہ ہو۔

پوائنٹ آف سیل (POS) پر ٹیکس چوری کی سزا میں اضافہ

• POS ٹرمینلز میں ٹیکس چوری روکنے کے لیے جرمانے کی رقم 5 لاکھ سے بڑھا کر 50 لاکھ روپے کرنے کی تجویز ہے۔

• کیش پر مختلف خفیہ ریٹس رکھنے والے تاجر بھی سخت کارروائی کی زد میں آئیں گے۔