لاہور: ڈائریکٹر جنرل ایل ڈی اے طاہر فاروق کی زیر صدارت آئی ٹی ریفارمز سے متعلق اعلیٰ سطحی اجلاس منعقد ہوا، جس میں ٹاؤن پلاننگ ونگ کو مکمل طور پر پیپر لیس بنانے کا فیصلہ کیا گیا۔ اجلاس میں ڈیجیٹلائزیشن، شفافیت اور جعلسازی کے خاتمے سے متعلق اہم اقدامات پر غور کیا گیا۔
اجلاس کے دوران ڈی جی ایل ڈی اے کو ٹاؤن پلاننگ ونگ میں جاری ڈیجیٹل ریفارمز سے متعلق تفصیلی بریفنگ دی گئی، جس پر ڈی جی ایل ڈی اے نے ٹاؤن پلاننگ سمیت تمام ونگز میں مینول نوٹسز کا مکمل خاتمہ کرنے کی ہدایت جاری کی۔
تمام نوٹسز پر کیو آر کوڈ لازم قرار
ڈی جی طاہر فاروق نے ہدایت دی کہ ایل ڈی اے کے تمام نوٹسز پر کیو آر کوڈ جلد از جلد لگایا جائے اور آئندہ صرف کیو آر کوڈ والے نوٹسز ہی جاری کیے جائیں، تاکہ جعلی نوٹسز اور جعلسازی کا مکمل سدباب کیا جا سکے۔انہوں نے مزید کہا کہ غیر قانونی تعمیرات، غیر قانونی پنلٹی اور دیگر نوٹسز کا مکمل ڈیجیٹل ریکارڈ مرتب کیا جائے، تاکہ ہر کارروائی کا شفاف ریکارڈ موجود ہو۔
“ایسا مؤثر سسٹم بنا رہے ہیں جس کے ذریعے جعلی نوٹسز جاری کرنے اور جعلسازی میں ملوث عناصر کے خلاف سخت کارروائی عمل میں لائی جائے گی۔” — ڈی جی ایل ڈی اے
آن لائن سروسز کی توسیع اور آسانی پر زور
اجلاس میں ایل ڈی اے کے ڈیجیٹل مانیٹرنگ یونٹ کے لیے تیار کردہ سافٹ ویئر پر بھی بریفنگ دی گئی۔ ڈی جی ایل ڈی اے نے کہا کہ شہری اب لینڈ یوز تبدیلی، املگیمیشن، سب ڈویژن سمیت دیگر سروسز بھی آن لائن حاصل کر سکیں گے، جس سے عوامی سہولت میں نمایاں بہتری آئے گی۔
انہوں نے کمپلیشن سرٹیفکیٹ کے پراسیس کے لیے بھی آن لائن ایپلیکیشن تیار کرنے کی ہدایت دی، تاکہ شہریوں کو دفاتر کے چکر نہ لگانے پڑیں۔
بلڈنگ پلان منظوری کا عمل مزید آسان بنانے کی ہدایت
ڈی جی ایل ڈی اے نے آن لائن بلڈنگ پلان منظوری کے پورٹل کا بھی جائزہ لیا اور ہدایت کی کہ اس عمل کو مزید آسان اور صارف دوست بنایا جائے۔
“غیر ضروری دستاویزات طلب نہ کی جائیں، اور پورٹل ایسا ہو کہ ہر شہری آسانی سے فائدہ اٹھا سکے۔” — ڈی جی ایل ڈی اے
اجلاس میں چیف میٹرو پولیٹن پلاننگ فیصل قریشی، چیف ٹاؤن پلانر ون اسدالزمان، چیف ٹاؤن پلانر ٹو اظہر علی اور ڈپٹی ڈائریکٹر آئی ٹی سمیت دیگر افسران نے شرکت کی۔
