پاکستانی اداکارہ و میزبان حنا الطاف نے حالیہ پاک بھارت کشیدگی کے تناظر میں پاکستانی عوام سے اپیل کی ہے کہ وہ بھارتی فنکاروں کو سوشل میڈیا پر اَن فالو اور اَن سبسکرائب کریں۔
اپنے انسٹاگرام پیغام میں حنا نے بغیر کسی کا نام لیے بھارتی فنکاروں کو مخاطب کرتے ہوئے کہا کہ پاکستان دونوں ممالک میں بے گناہ جانوں کے ضیاع کی مذمت کرتا ہے، لیکن یہ تکلیف دہ ہے کہ ہمارے غم کے وقت دوسری طرف خوشی اور جشن منایا جا رہا ہے۔
اداکارہ نے کہا، “میری بس اتنی سی گزارش ہے کہ اُن لوگوں کو فالو نہ کریں جو ہمارے دُکھ پر خاموش رہتے ہیں، اور اُن پاکستانی فنکاروں سے بھی ہوشیار رہیں جو ہمارے ساتھ ہوتے ہوئے بھی ملک کے حق میں بولنے سے گریز کرتے ہیں۔”
حنا الطاف نے زور دیا کہ پاکستان ہمیشہ امن اور دوستی کی بات کرتا رہا ہے، لیکن جب دوسری طرف سے اشتعال انگیز رویہ اپنایا جائے تو یکطرفہ امن ممکن نہیں ہوتا۔
ان کا کہنا تھا کہ ہمیں ایسے لوگوں سے جُڑنے کی ضرورت ہے جو مشکل وقت میں سچ اور انصاف کے ساتھ کھڑے ہوں۔
