امریکا میں چھ دہائیوں سے لاپتا خاتون زندہ حالت میں بازیاب، کیس نے سب کو حیران کردیا

امریکا میں 60 سال قبل لاپتا ہونے والی خاتون حیرت انگیز طور پر صحیح سلامت مل گئی ہیں، جس نے عوام اور حکام دونوں کو حیرت میں ڈال دیا ہے۔

ریاست وسکونسن کی ساؤک کاؤنٹی کے شیرف آفس کی جانب سے جاری کردہ بیان کے مطابق 82 سالہ آڈرے بیکبرگ، جو جولائی 1962 میں صرف 20 سال کی عمر میں غائب ہو گئی تھیں، ایک اور امریکی ریاست میں زندگی گزارتی ہوئی پائی گئیں۔ تاہم، حکام نے اُس ریاست کا نام ظاہر نہیں کیا۔

شیرف آفس کے مطابق تحقیقات سے یہ بات سامنے آئی ہے کہ آڈرے کی گمشدگی کسی جرم یا اغوا کا نتیجہ نہیں تھی، بلکہ وہ اپنی مرضی سے خود کو علیحدہ کر کے ایک نئی زندگی اختیار کر چکی تھیں۔

وسکونسن کے محکمہ انصاف کے ریکارڈ کے مطابق آڈرے نے 7 جولائی 1962 کو اپنے اہل خانہ کو خیرباد کہا۔ ان کے گھر کام کرنے والی آیا نے بتایا کہ وہ اور آڈرے لفٹ کے ذریعے میڈیسن شہر پہنچے تھے، جہاں سے آڈرے نے انڈیاناپولِس جانے والی گرے ہاؤنڈ بس لی۔ آیا کے مطابق اُس نے آڈرے کو آخری مرتبہ بس اسٹاپ کے قریب ایک کونے کی جانب جاتے دیکھا تھا۔

یاد رہے کہ آڈرے بیکبرگ نے لاپتا ہونے سے قبل اپنے شوہر کے خلاف گھریلو تشدد اور قتل کی دھمکیوں کی شکایت درج کرائی تھی، جو ممکنہ طور پر ان کے غائب ہونے کی ذاتی وجہ رہی ہو سکتی ہے۔

یہ کیس اس بات کی ایک زندہ مثال ہے کہ بعض اوقات گمشدگیاں جرائم کی بجائے ذاتی فیصلوں کا نتیجہ بھی ہو سکتی ہیں۔