اسلام آباد ۔پاک سوزوکی نے اپنی مشہور ہیچ بیک سوزوکی کلٹس کی قیمتوں میں قابلِ ذکر اضافہ کر دیا ہے۔ اب اس گاڑی کے مختلف ماڈلز کی قیمتیں 4.23 ملین روپے سے بڑھ کر 4.6 ملین روپے تک پہنچ گئی ہیں۔
سوزوکی کلٹس وی ایکس آر (VXR) کی قیمت میں 3 لاکھ 72 ہزار روپے کا اضافہ کیا گیا ہے، جس کے بعد اس کی نئی قیمت 42 لاکھ 30 ہزار روپے ہو گئی ہے۔ اس سےپہلے یہ ماڈل 38 لاکھ 58 ہزار روپے میں دستیاب تھا۔
دوسری جانب وی ایکس ایل (VXL) اور اے جی ایس (AGS) ویریئنٹس کی قیمتوں میں بالترتیب 72 ہزار روپے کا اضافہ کیا گیا ہے۔ اب VXL ماڈل 43 لاکھ 16 ہزار روپے اور AGS ماڈل 46 لاکھ 18 ہزار روپے میں فروخت ہو رہا ہے۔
یہ اضافہ صرف قیمتوں تک محدود نہیں بلکہ کمپنی نے گاڑیوں میں نئے حفاظتی فیچرز بھی شامل کیے ہیں۔ نئی اپڈیٹڈ کلٹس میں اب ریئر سینٹر سیٹ بیلٹ، ریئر ہیڈ ریسٹرینٹس، ISO-FIX چائلڈ سیٹ اینکرز، اور ڈرائیور سیٹ بیلٹ وارننگ بزر جیسی خصوصیات شامل ہیں۔
VXR ماڈل میں بھی اہم اپڈیٹس کی گئی ہیں، جن میں ڈوئل فرنٹ ایئر بیگز، اینٹی لاک بریکنگ سسٹم (ABS)، اور 60:40 اسپِلِٹ فولڈنگ ریئر سیٹیں شامل کی گئی ہیں۔
کمپنی کا کہنا ہے کہ ان تبدیلیوں کا مقصد گاڑی کی حفاظت اور ڈرائیونگ کے آرام کو بہتر بنانا ہے۔ یہ اقدامات اس وقت کیے گئے ہیں جب سوزوکی کلٹس، بہترین فیول ایوریج، کم مینٹی نینس، اور اچھی ری سیل ویلیو کے باعث 1000 سی سی کیٹیگری میں نمایاں مقام رکھتی ہے۔
اس کے ساتھ ہی سوزوکی نے اپنی دوسری مقبول گاڑی سوئفٹ کی قیمت میں بھی 80 ہزار روپے کا اضافہ کر دیا ہے، جس کے بعد اس کی نئی قیمت 44 لاکھ 16 ہزار روپے ہو گئی ہے۔
