لاہور: وزیراعلیٰ پنجاب مریم نواز سے امریکہ کے کانگریسی وفد نے ملاقات کی، جس دوران سرمایہ کاری کے دائرہ کار کو مزید پھیلانے کے عزم کو دہرایا گیا۔
اس وفد میں رکنِ کانگریس ٹام سوزی، جوناتھن جیکسن، سیاسی افسر نکھل ہاکن، قائم مقام امریکی سفیر نتالی بیکر اور قونصل جنرل کرسٹن ہاکنز شامل تھے۔
اس ملاقات میں باہمی دلچسپی کے اہم پہلوؤں پر گفتگو ہوئی، پاک-امریکہ تعلقات کو مضبوط بنانے اور فروغ دینے کے لیے مؤثر حکمتِ عملی پر اتفاق کیا گیا۔ اس کے ساتھ ساتھ پنجاب میں سرمایہ کاری اور معاشی استحکام کے لیے دوطرفہ اشتراک بڑھانے کا عزم ظاہر کیا گیا۔ دونوں فریقین کے مابین تجارت، سرمایہ کاری، جمہوریت اور ادارہ جاتی روابط کے حوالے سے بھی تفصیلی بات چیت ہوئی۔
وزیراعلیٰ مریم نواز شریف نے امریکی وفد کو پنجاب میں زراعت، انفارمیشن ٹیکنالوجی، توانائی، صحت اور تعلیم کے شعبوں میں سرمایہ کاری کی دعوت دی۔ انہوں نے یہ تجویز بھی پیش کی کہ پارلیمانی سطح پر وفود کا تبادلہ مزید بڑھایا جائے۔
وزیراعلیٰ کا کہنا تھا کہ پنجاب حکومت بیرونی سرمایہ کاری کو وسعت دینے کے لیے پُرعزم ہے۔ آئی ٹی کے شعبے میں پاک-امریکہ تعاون ایک نئے دور میں داخل ہو چکا ہے۔ ہم امریکہ کے ساتھ تعلقات کو قدر کی نگاہ سے دیکھتے ہیں اور اس شراکت داری کو مزید آگے بڑھانے کے خواہاں ہیں۔
انہوں نے مزید کہا کہ پنجاب کو ترقی کی نئی راہوں پر گامزن کرنے کے لیے تیار ہیں، اور صوبائی حکومت غیر ملکی سرمایہ کاری کے فروغ کے لیے مخصوص اقدامات کر رہی ہے۔ سرمایہ کاروں کو اسپیشل انویسٹمنٹ فیسلیٹیشن کونسل (SIFC) کے تحت “ون ونڈو” نظام کے ذریعے تمام سہولیات فراہم کی جا رہی ہیں۔
