مودی سرکار کی انتقامی کارروائی: سونیا اور راہول گاندھی کیخلاف مقدمے کا آغاز

انفورسمنٹ ڈائریکٹوریٹ (ای ڈی) نے منگل کے روز نیشنل ہیرالڈ منی لانڈرنگ کیس میں کانگریس کی اعلیٰ قیادت کے خلاف اہم قدم اٹھاتے ہوئے سونیا گاندھی، راہول گاندھی اور اوورسیز کانگریس کے صدر سیم پٹروڈا کے خلاف باضابطہ چارج شیٹ عدالت میں جمع کرا دی ہے۔

بھارتی میڈیا رپورٹس کے مطابق، اس مقدمے کی سماعت کے لیے خصوصی عدالت نے 25 اپریل کی تاریخ مقرر کی ہے۔ کیس کی نگرانی کرنے والے جج، وِشال گوگنے نے کہا ہے کہ اگلی کارروائی اسی دن سے شروع کی جائے گی، جب ای ڈی کے وکیل اور تحقیقاتی افسر عدالت میں تمام ضروری شواہد اور کیس ڈائریاں پیش کریں گے۔

یہ پہلا موقع ہے جب گاندھی خاندان کے ان نمایاں افراد کے خلاف کسی کیس میں باضابطہ چارج شیٹ داخل کی گئی ہے۔ اس پیش رفت پر کانگریس پارٹی یا گاندھی خاندان کی جانب سے فی الحال کوئی ردِعمل سامنے نہیں آیا۔

یاد رہے کہ گزشتہ ہفتے ای ڈی نے ایسوسی ایٹڈ جرنلز لمیٹڈ (AJL) سے وابستہ 661 کروڑ روپے مالیت کی جائیدادیں ضبط کرنے کے نوٹس جاری کیے تھے۔ یہ اثاثے دہلی کے بہادر شاہ ظفر مارگ، ممبئی کے باندرہ علاقے اور لکھنؤ کے بشیشر ناتھ روڈ پر واقع عمارتوں سے متعلق ہیں، جنہیں نومبر 2023 میں ضبط کیا گیا تھا۔

اس کیس کی تفتیش 2021 میں شروع ہوئی، جس کی بنیاد بی جے پی رہنما سبرامنیم سوامی کی جانب سے دائر کردہ ایک نجی شکایت تھی۔ یہ شکایت جون 2014 میں دہلی کی پٹیالہ ہاؤس کورٹ میں جمع کرائی گئی تھی، جس میں دعویٰ کیا گیا تھا کہ کانگریس رہنماؤں نے “ینگ انڈین پرائیویٹ لمیٹڈ” کے ذریعے مجرمانہ منصوبہ بندی کے تحت نیشنل ہیرالڈ کی ملکیت میں موجود 2,000 کروڑ روپے مالیت کی جائیدادیں غیر قانونی طریقے سے اپنے قبضے میں لیں۔

نیشنل ہیرالڈ اخبار دراصل ایسوسی ایٹڈ جرنلز لمیٹڈ (AJL) کی ملکیت ہے، جسے ینگ انڈین کمپنی چلاتی ہے۔ اس کمپنی کے سب سے بڑے شیئر ہولڈرز سونیا اور راہول گاندھی ہیں۔

دوسری جانب، چارج شیٹ داخل ہونے سے چند گھنٹے قبل ای ڈی نے راہول گاندھی کے بہنوئی اور پریانکا گاندھی کے شوہر رابرٹ واڈرا کو بھی ایک علیحدہ منی لانڈرنگ کیس میں طلب کر لیا، جو ہریانہ میں جائیداد کے ایک مشتبہ سودے سے متعلق ہے۔

رابرٹ واڈرا نے اس کارروائی کو سیاسی انتقام قرار دیتے ہوئے کہا ہے کہ وہ پہلے بھی اس معاملے پر کئی بار ایجنسی کے سوالات کا سامنا کر چکے ہیں، اور یہ سب انتخابات سے قبل اپوزیشن پر دباؤ ڈالنے کی ایک کوشش ہے۔

یاد رہے کہ یہ معاملہ 2008 میں زمین کی خرید و فروخت سے متعلق ہے، جب واڈرا کی کمپنی اسکائی لائٹ ہاسپیٹیلٹی نے 7.5 کروڑ روپے میں زمین خرید کر ہاؤسنگ پروجیکٹ کے لیے پرمٹ حاصل کیا تھا، اور بعد ازاں وہی زمین ڈی ایل ایف کو 58 کروڑ روپے میں فروخت کی گئی۔ اُس وقت ہریانہ میں کانگریس کی حکومت تھی، اور سابق وزیر اعلیٰ بھوپندر سنگھ ہڈا نے کسی بھی غلطی سے انکار کیا ہے۔