لاہور: وزیراعلیٰ پنجاب مریم نواز نے کہا ہے کہ اقلیتوں کے جان و مال کے تحفظ کو ریڈ لائن قرار دے کر اس کی حفاظت کو یقینی بنایا جا رہا ہے۔
وزیراعلیٰ پنجاب مریم نواز نے ہندو برادری کے تہوار ہولی کے موقع پر پیغام جاری کرتے ہوئے کہا کہ رنگوں کا یہ خوبصورت تہوار ہولی محبت، امن اور بھائی چارے کی علامت ہے۔ انہوں نے کہا کہ پاکستان مختلف مذاہب کی برادریوں کا حسین امتزاج ہے، جہاں سب کو یکساں حقوق اور مواقع فراہم کیے جا رہے ہیں۔ مریم نواز نے دعا کی کہ یہ دن سب کے لیے خوشیوں، محبت اور بین المذاہب ہم آہنگی کا پیغام لے کر آئے۔
وزیراعلیٰ پنجاب نے مزید کہا کہ پنجاب صوفیاء، محبت اور رواداری کی دھرتی ہے، اور یہاں ہر مذہب اور ہر برادری کو مکمل احترام حاصل ہے۔ ان کا کہنا تھا کہ وہ ایسا پنجاب چاہتے ہیں جہاں ہر شہری خود کو محفوظ، بااختیار اور برابر کا پاکستانی محسوس کرے۔
مریم نواز نے بتایا کہ حکومت پنجاب اقلیتوں کے تحفظ اور فلاح و بہبود کے لیے عملی اقدامات کر رہی ہے، اور اقلیتی برادری کے افراد کو تعلیم، صحت، روزگار اور دیگر بنیادی سہولتیں یکساں طور پر فراہم کی جا رہی ہیں۔
انہوں نے یہ بھی کہا کہ منیارٹی کارڈ کے ذریعے نادار اقلیتی بہن بھائیوں کی مدد کی جا رہی ہے، اور اقلیتوں کے مذہبی تہواروں کے لیے گرانٹس میں اضافہ کیا گیا ہے۔ مریم نواز نے مزید کہا کہ پنجاب حکومت اقلیتوں کے مذہبی اور ثقافتی تہواروں کو سرکاری سطح پر منانے کا اہتمام بھی کر رہی ہے۔
