اسلام آباد: عالمی مالیاتی فنڈ (آئی ایم ایف) کے وفد نے وزیر خزانہ محمد اورنگزیب کو معاشی تعاون فراہم کرنے کی یقین دہانی کرائی ہے۔
پاکستان کو 7 ارب ڈالر کے بیل آؤٹ پیکیج میں سے ایک ارب ڈالر کی اگلی قسط کی ادائیگی کے حوالے سے اقتصادی جائزے کے لیے آئی ایم ایف کا وفد پاکستان میں موجود ہے۔
آئی ایم ایف وفد اور پاکستان کی معاشی ٹیم کے درمیان اقتصادی جائزہ مذاکرات کا آج آخری دن ہے۔
اس حوالے سے مذاکرات کے لیے آئی ایم ایف کا وفد وزارت خزانہ پہنچا اور وزیر خزانہ محمد اورنگزیب سے ملاقات کی۔ وفد نے اب تک پاکستان کی معاشی ٹیم کی کارکردگی اور اقدامات کو سراہا۔
وزارت خزانہ کے ذرائع کے مطابق، وزیر خزانہ محمد اورنگزیب نے آئی ایم ایف کو تمام اہداف پر مکمل عملدرآمد کی یقین دہانی کرائی اور کہا کہ قرض پروگرام میں شامل تمام اہداف کی خلاف ورزی نہیں کی جائے گی۔
