اسلام آباد۔نیشنل الیکٹرک پاور ریگولیٹری اتھارٹی (نیپرا) نے ملک بھر کے بجلی صارفین کے لیے ماہانہ ایڈجسٹمنٹ کے تحت بجلی کی قیمتوں میں کمی کر دی ہے۔
نیپرا کی جانب سے جاری کردہ نوٹیفکیشن کے مطابق، کراچی کے علاوہ باقی ملک میں بجلی کی قیمت میں 2 روپے 12 پیسے فی یونٹ کی کمی کی گئی ہے، جبکہ کے الیکٹرک کے صارفین کے لیے بجلی کی قیمت 3 روپے فی یونٹ کم کی گئی ہے۔
نوٹیفکیشن میں بتایا گیا ہے کہ صارفین کو بجلی کی قیمتوں میں کمی کا فائدہ مارچ کے بلوں میں ملے گا۔
نوٹیفکیشن کے مطابق، کے الیکٹرک کے لیے بجلی کی قیمت دسمبر 2024 کی ماہانہ ایڈجسٹمنٹ کے تحت کم کی گئی، جبکہ باقی ملک کے لیے جنوری 2025 کی ایڈجسٹمنٹ میں بجلی کی قیمتوں میں کمی کی گئی ہے۔
گزشتہ مہینے بھی نیپرا نے دسمبر کی فیول پرائس ایڈجسٹمنٹ کے تحت فی یونٹ بجلی کی قیمت میں 1.22 روپے کی کمی کی تھی، جس کا فائدہ فروری کے بلوں میں صارفین کو ملے گا۔ فیول پرائس ایڈجسٹمنٹ کی کمی کا اطلاق لائف لائن صارفین پر نہیں ہوگا۔
کے الیکٹرک کے صارفین کو فروری کے بلوں میں ریلیف دیا جائے گا۔ کے الیکٹرک کے لیے نومبر کی فیول پرائس ایڈجسٹمنٹ کے تحت فی یونٹ بجلی کی قیمت میں 1 روپے 23 پیسے کی کمی کی گئی تھی۔
