مشہور ٹک ٹاکر دانیہ شاہ اور ان کے شوہر حکیم شہزاد لوہا پاڑ ایک سنگین سڑک حادثے میں مبتلا ہو گئے، جس کے نتیجے میں ایک شخص جان کی بازی ہار گیا جبکہ ایک خاتون زخمی ہوئیں۔
یہ حادثہ اس وقت پیش آیا جب حکیم شہزاد اور دانیہ شاہ اپنی ٹیم کے ساتھ سفر کر رہے تھے کہ اچانک ایک تیز رفتار موٹر سائیکل ان کی گاڑی سے آ ٹکرائی۔
حکیم شہزاد کے مطابق، موٹر سائیکل سوار غلط سمت سے آ رہے تھے اور بے قابو ہو کر گاڑی سے جا ٹکرائے۔ موٹر سائیکل پر سوار میاں بیوی میں سے شوہر موقع پر جاں بحق ہو گیا جبکہ بیوی زخمی ہو گئیں۔
انہوں نے مزید بتایا کہ گاڑی ان کا ڈرائیور چلا رہا تھا، جبکہ ان کے ساتھ کیمرہ مین اور دیگر عملہ بھی موجود تھا۔ حادثے کے دوران دانیہ شاہ محفوظ رہیں، لیکن حکیم شہزاد کو سر پر چوٹ لگنے سے بے ہوشی طاری ہوگئی۔
حادثے کی شدت کا اندازہ اس سے لگایا جا سکتا ہے کہ گاڑی بری طرح متاثر ہوئی۔ حکیم شہزاد کا کہنا ہے کہ وہ ابھی تک ذہنی طور پر مکمل صحت یاب نہیں ہو سکے۔
انہوں نے نشے میں گاڑی چلانے کے الزامات کی تردید کرتے ہوئے وضاحت کی کہ گاڑی ڈرائیور چلا رہا تھا اور وہ خود بھی اس حادثے سے شدید صدمے میں مبتلا ہیں۔
حکیم شہزاد نے کہا کہ وہ جاں بحق ہونے والے شخص کے بچوں اور اہل خانہ کی مالی مدد کرنے کا ارادہ رکھتے ہیں۔
یاد رہے کہ دانیہ شاہ نے جولائی 2024 میں حکیم شہزاد لوہا پاڑ سے شادی کی تھی۔ اس سے قبل وہ فروری 2022 میں معروف اسکالر عامر لیاقت سے رشتہ ازدواج میں منسلک ہوئی تھیں، جو جون 2022 میں انتقال کر گئے تھے۔
حادثے کی ویڈیو سوشل میڈیا پر وائرل ہو چکی ہے، جس میں حکیم شہزاد کی گاڑی کو بری طرح تباہ شدہ حالت میں دیکھا جا سکتا ہے۔
