رمضان کے دوران کئی افراد سحری اور افطاری میں زیادہ مقدار میں کھانے کی وجہ سے وزن میں اضافے کا سامنا کرتے ہیں۔
وزن کو متوازن رکھنے کے لیے ضروری ہے کہ خود کو ہائیڈریٹ رکھیں، کسی نہ کسی قسم کی جسمانی سرگرمی کو معمول بنائیں اور سب سے اہم بات، ایسی خوراک کا انتخاب کریں جو وزن کو قابو میں رکھنے میں معاون ہو۔
ذیل میں کچھ ایسی غذائیں درج کی جا رہی ہیں جو وزن کم کرنے میں مددگار ثابت ہو سکتی ہیں۔
انڈے
انڈے پروٹین اور صحت بخش چکنائی کے شاندار ذرائع میں شامل ہیں کیونکہ یہ دیر تک پیٹ بھرے رہنے کا احساس دلاتے ہیں، جس سے غیر ضروری کھانے کی خواہش کم ہوتی ہے۔
تخم شربتی (Chia Seeds)
تخم شربتی فائبر اور اومیگا تھری فیٹی ایسڈز سے بھرپور ہوتے ہیں اور انہیں دہی یا دیگر ناشتے میں شامل کر کے بھوک کو مؤثر طریقے سے کم کیا جا سکتا ہے۔
دہی
دہی ایک غذائیت بخش خوراک ہے جو پروٹین سے لبریز ہونے کے ساتھ ساتھ پروبائیوٹکس بھی فراہم کرتی ہے، جو نظام ہاضمہ کو بہتر بنانے میں مدد دیتے ہیں۔ یہ وزن کے کنٹرول کے لیے ایک بہترین انتخاب ثابت ہو سکتا ہے۔
چکن
چکن یا دیگر دبلا پتلا گوشت پروٹین اور آئرن سے بھرپور ہوتا ہے، جبکہ اس میں چکنائی کی مقدار دیگر اقسام کے گوشت کے مقابلے میں کم ہوتی ہے، جس کی بدولت یہ وزن کم کرنے والے افراد کے لیے موزوں ہے۔
فائبر سے بھرپور پھل
پھل جو فائبر اور غذائی اجزاء سے مالا مال ہوتے ہیں، وزن گھٹانے میں اہم کردار ادا کرتے ہیں۔ پپیتا، تربوز، امرود اور سیب جیسے پھل نہ صرف بھوک مٹانے میں مددگار ہوتے ہیں بلکہ ہاضمے کو بھی بہتر بناتے ہیں۔
