یش چوپڑا نے 2004 میں فلم ویر زارا کے ذریعے ہدایتکاری کی دنیا میں واپسی کی۔ یہ فلم ہندوستان اور پاکستان کے پس منظر میں بنی ایک جذباتی محبت کی داستان تھی، جس نے ناظرین کے دلوں کو چھو لیا۔ لیکن کیا آپ جانتے ہیں کہ اس فلم کے مرکزی کرداروں کے لیے اجے دیوگن اور کاجول کو کاسٹ کرنے کا منصوبہ بنایا گیا تھا؟
اجے دیوگن اور کاجول کی جگہ شاہ رخ اور پریتی کیسے آئے؟
ویر زارا میں شاہ رخ خان نے بھارتی فضائیہ کے افسر ویر پرتاپ سنگھ کا کردار نبھایا، جبکہ پریتی زنٹا نے پاکستانی لڑکی زارا حیات خان کا کردار ادا کیا۔ یہ فلم نہ صرف ایک بلاک بسٹر ثابت ہوئی بلکہ دنیا بھر سے 105 کروڑ روپے کا شاندار بزنس کرنے میں کامیاب رہی۔
رپورٹس کے مطابق، یش چوپڑا کاجول کو مرکزی کردار میں لینا چاہتے تھے، کیونکہ وہ پہلے ہی “دل والے دلہنیا لے جائیں گے” میں شاہ رخ کے ساتھ ایک کامیاب جوڑی بنا چکی تھیں۔ تاہم، کاجول نے نامعلوم وجوہات کی بنا پر فلم میں کام کرنے سے انکار کر دیا، اور یہ کردار بالآخر پریتی زنٹا کے حصے میں آ گیا۔
ایشوریا رائے کی جگہ رانی مکھرجی کیسے کاسٹ ہوئیں؟
فلم میں رانی مکھرجی نے پاکستانی وکیل سمیعہ صدیقی کا اہم کردار نبھایا۔ تاہم، ابتدا میں یہ کردار ایشوریا رائے کے لیے رکھا گیا تھا۔ اطلاعات کے مطابق، اس وقت سلمان خان کے ساتھ ان کے خراب تعلقات اور فلم کے سیٹ پر ان کی مداخلت کی وجہ سے انہیں دو بڑے پراجیکٹس، یعنی چلتے چلتے اور ویر زارا سے ہاتھ دھونا پڑا۔ نتیجتاً، ان کی جگہ رانی مکھرجی کو فلم میں شامل کر لیا گیا۔
اجے دیوگن نے کیوں انکار کیا؟
فلم میں منوج باجپائی نے زارا کے منگیتر رضا شیرازی کا کردار نبھایا، لیکن یہ کردار سب سے پہلے اجے دیوگن کو آفر کیا گیا تھا۔ اجے نے اسے مسترد کر دیا کیونکہ وہ اپنے ہم عصر شاہ رخ خان کے مقابل ایک مہمان کردار ادا کرنے کے خواہشمند نہیں تھے۔
یوں، کئی تبدیلیوں کے بعد ویر زارا کی آئکونک کاسٹ مکمل ہوئی، اور یہ فلم نہ صرف یش چوپڑا کی بہترین فلموں میں شامل ہوئی بلکہ آج بھی بالی ووڈ کی سب سے یادگار رومانی کہانیوں میں سے ایک سمجھی جاتی ہے۔
