شیخوپورہ ۔اینٹی نار کو ٹکس فورس پنجاب کے زیر انتظام شیخوپورہ میں منشیات جلانے کی سالانہ تقریب کا انعقادکیا گیا۔انسداد منشیات کی تقریب میں ڈائریکٹر جنرل اینٹی نار کوٹکس فورس میجر جنرل عبد المعید، ہلال امتیاز ملٹری نے مہمان خصوصی کی حیثیت سے شرکت کی۔
سول، ملٹری آفیسرز اور دیگر قانون نافذ کرنے والے اداروں کے نمائندوں، یونیورسٹیوں اور کالجز کے سربراہان، طلباء و طالبات اور این جی اوز کے ممبران کی کثیر تعداد نے بھی شرکت کی۔
تقریب کا آغاز تلاوت کلام پاک سے ہوا۔ ریجنل ڈائریکٹر کمانڈر اینٹی نار کو ٹکس پنجاب نے ابتدائی کلمات میں حاضرین کو خوش آمدید کہا اور منشیات سے پاک معاشرے کے نظریے کو عملی جامہ پہنانے کے لئے اینٹی نار کو ٹکس فورس کی کوششوں اور کار کردگی پر روشنی ڈالی۔
اس سال ریجنل ڈائریکٹوریٹ پنجاب کی طرف سے تقریباً 15 ٹن منشیات تلف کی گئی ہیں جس میں ہیروئن، چرس، آئیس ، کوکین ، Ecstasy Tablets، شراب اور دیگر پریکرسر کیمیکلز شامل ہیں۔
اس کے علاوہ سال کے دوران اب تک اے این ایف پنجاب نے منشیات اسمگلروں کے خلاف 511 کیسز درج کیے۔ انسداد منشیات سپیشل عدالت پنجاب نے 69 مجرموں کو عمر قید اور 238 مجرموں کو دیگر سخت سزائیں سنائیں۔
ہر سال منشیات تلف کرنے کی اس تقریب کا مقصد عوام کے ساتھ مل کر منشیات کے استعمال اورپھیلااو سے بچنے کے عزم کا اعادہ کرنا ہے۔ سول سوسائٹی کے اراکین حکومتی اداروں کے ساتھ مل کر منشیا ت کے خلاف اس جہاد میں حصہ لیں تو جلد اس خطرے پر قابو پایا جاسکے گا۔
تقریب کے آخر میں مہمان خصوصی، ڈائریکٹر جنرل اینٹی نارکوٹکس فورس میجر جنرل عبدالمعید ہلال امتیاز ملڑی نے تقریب سے خطاب کیا۔ انہوں نے اپنے خطاب میں کہا کہ اینٹی نارکوٹکس فورس اپنی قلیل نفری اور محدد وسائل کے باوجود منشیات کے مکروہ دھندے میں ملوث عناصر کی سرکوبی کے لئے بلا امتیاز کاروائی جاری رکھے ہوئے ہے۔ اس قومی مشن میں پاکستان رینجرز، پولیس، کسٹمز سمیت دیگر قانون نافذ کرنے والے اداروں کا زبردست تعاون قابل تحسین ہے
علاوہ ازیں منشیات کے خلاف آگاہی مہم چلا کر اس کے استعمال میں بھی کمی لانے کے لئے کوشاں ہے۔ گزشتہ سال ستمبر سے اے این ایف ایک منظم طریقے سے تعلیمی اداروں کو منشیات کی لعنت سے بچانے کے لئے قومی سطح پر مہم چلا رہی ہے۔ اس ضمن میں تقریبا 100 سے زیادہ یونیورسٹیز میں آگاہی پروگرام منعقد کروائےجاچ±کے ہیں اور مزید ڈیڑھ سو اداروں میں آگاہی پروگرام تیس اپریل ۲۰۲۵ تک مکمل کیا جائے گا۔
آج کے دن جلائے جانے والی منشیات اندرونِ ملک استعمال ہونا تھی یاپھر ملک سے باہر سمگل کی جانی تھی جس کو اینٹی نارکوٹکس فورس اور دیگر قانون نافذ کرنے والے اداروں کے اہلکاروں نے اپنی زندگیوں کو خطرے میں ڈال کر پکڑا ہے۔ ہم بین الا قوامی قوانین اور اقوام متحدہ کے کنونشنز کی پاسداری کے لئے پر عزم ہیں۔
تقریب کے آخر میں منشیات کے خلاف جنگ میں اے این ایف کے شانہ بشانہ کام کرنے والوں کی حوصلہ افزائی کے لیے توصیفی اسناد بھی تقسیم کی گئیں
