راولپنڈی۔بھارت کے لیے سپرائز ڈے اور پاکستان کی خودمختاری کے دفاع کے عزم کی تجدید کا دن ہے۔ آپریشن سوئفٹ ریٹارٹ کو چھ سال مکمل ہو گئے۔
پاک فضائیہ نے 27 فروری 2019 کو بھارتی جارحیت کا تاریخی جواب دیا۔ 26 فروری کو بھارتی فضائیہ نے جعلی سرجیکل اسٹرائیک کا دعویٰ کیا اور پاکستانی فضائی حدود کی خلاف ورزی کی۔
پاک فضائیہ کے شاہینوں نے دن کی روشنی میں بھارتی دراندازی کا بھرپور جواب دیتے ہوئے 27 فروری کو دو بھارتی لڑاکا طیارے مار گرائے اور بھارتی پائلٹ ابھی نندن کو گرفتار کر لیا۔
مزید پڑھیں: آپریشن سوئفٹ ریٹارٹ کے 6 سال مکمل ہونے پر آئی ایس پی آر کا نیا نغمہ ریلیز
آپریشن کے چھ سال مکمل ہونے پر چیئرمین جوائنٹ چیفس آف اسٹاف اور سروسز چیفس نے مسلح افواج کو زبردست خراج تحسین پیش کیا۔
آئی ایس پی آر کے مطابق، عسکری قیادت نے پاک افواج کے غیرمتزلزل حوصلے، پیشہ ورانہ مہارت اور قربانیوں کو سراہا۔ آپریشن سوئفٹ ریٹارٹ، بھارت کی بلاجواز جارحیت کے خلاف ایک مؤثر اور مدبرانہ ردعمل تھا۔
آئی ایس پی آر کا کہنا ہے کہ اس آپریشن نے پاکستان کے اپنی خودمختاری اور علاقائی سالمیت کے تحفظ کے عزم کو مزید مضبوط کیا، جبکہ مسلح افواج کی آپریشنل صلاحیتوں اور تیاری کو اجاگر کیا۔
پاک فوج کے ترجمان کے مطابق، پوری کارروائی کے دوران آپریشنل برتری برقرار رکھی گئی، اور عسکری قیادت نے قومی سلامتی اور استحکام کے تحفظ کے عزم کا اعادہ کیا۔
علاقائی امن کے فروغ کی اہمیت پر زور دیتے ہوئے، عسکری قیادت نے واضح کیا کہ مسلح افواج ہر قسم کے خطرے کا بھرپور جواب دینے کے لیے مکمل طور پر تیار ہیں اور عوام کے اعتماد پر پورا اتریں گی۔
