اسلام آباد ۔وزیرِاعظم شہباز شریف نے آپریشن سوئفٹ ریٹارٹ کے چھ سال مکمل ہونے پر افواجِ پاکستان کی جرات، بہادری، پیشہ ورانہ مہارت اور قربانیوں کو زبردست خراج تحسین پیش کیا۔
اپنے بیان میں انہوں نے کہا کہ 27 فروری 2019 کو پاکستان ایئر فورس نے دشمن کو یہ واضح پیغام دیا کہ پاکستان اپنی سرحدوں کے دفاع کی مکمل صلاحیت رکھتا ہے۔
وزیرِاعظم کا کہنا تھا کہ بھارت کی جارحیت کا منہ توڑ جواب دیتے ہوئے ہماری افواج نے ثابت کر دیا کہ ملک کی سلامتی کے تحفظ کے لیے ہمارے جوان ہر لمحہ تیار ہیں۔
انہوں نے کہا کہ آپریشن سوئفٹ ریٹارٹ میں پاک فضائیہ نے اپنی عسکری مہارت اور وطن کے دفاع کے غیر متزلزل عزم سے دشمن کو واضح کر دیا کہ افواجِ پاکستان کسی بھی جارحیت کا بھرپور مقابلہ کرنے کی مکمل صلاحیت رکھتی ہیں۔
وزیرِاعظم نے مزید کہا کہ پوری قوم کو اپنی بہادر افواج پر فخر ہے، جو ملک کی حفاظت کے لیے عظیم قربانیاں دے رہی ہیں، اور ان قربانیوں کو قوم کبھی فراموش نہیں کر سکتی۔
انہوں نے اس عزم کا اعادہ کیا کہ پاکستان ہمیشہ علاقائی امن کے فروغ کے لیے کوشاں رہا ہے، لیکن اگر کبھی ملکی سلامتی یا استحکام کو چیلنج کیا گیا تو پوری قوم متحد ہو کر دفاع کرے گی۔
