میڈیا رپورٹس کے مطابق، جاپان کی فوکوشیماکن کیساٹسوگاکو نامی پولیس اکیڈمی نے رواں سال جنوری میں 60 پولیس کیڈٹس کے لیے ایک منفرد میک اپ کورس کا آغاز کیا، جن میں وہ کیڈٹس بھی شامل ہیں جو جلد ہی گریجویشن مکمل کرنے والے ہیں۔
کورس کے دوران کیڈٹس کو میک اپ کی بنیادی تکنیکیں سکھائی جاتی ہیں، جن میں بھنوؤں کی درستگی، جلد کی موئسچرائزنگ، اور پرائمر کا استعمال شامل ہے۔ اس کے علاوہ، انہیں ابرو تراشنا اور بالوں کی اسٹائلنگ جیسے گرومنگ کے اصولوں سے بھی روشناس کرایا جاتا ہے۔
پولیس اکیڈمی کے وائس پرنسپل تاکیشی سوگیورا کے مطابق، اس تربیت کا مقصد پولیس اہلکاروں کی پیشہ ورانہ اور صاف ستھری ظاہری شکل کو برقرار رکھنا ہے، کیونکہ وہ براہِ راست کمیونٹی سے رابطے میں رہتے ہیں۔
انہوں نے کہا، “ہم اپنے پولیس طلبا کو یہ احساس دلانا چاہتے ہیں کہ ایک صاف ستھرا اور پیشہ ورانہ انداز اپنانا، نہ صرف بطور معاشرتی فرد بلکہ ایک مستقبل کے پولیس افسر کے طور پر بھی انتہائی ضروری ہے۔”
