ملائیشیا میں بھارتی نژاد خاتون ریچل کور اپنی غیر معمولی روزمرہ کی مصروفیات کے باعث عالمی توجہ حاصل کر رہی ہیں۔ وہ ایئر ایشیا میں فنانس آپریشنز کی اسسٹنٹ مینیجر کے طور پر کام کرتی ہیں اور دو بچوں کی ماں بھی ہیں۔
روزانہ 400 کلومیٹر کا ہوائی سفر
ٹائمز آف انڈیا کے مطابق، ریچل ہر روز پینانگ سے کوالالمپور تک ہوائی سفر کرتی ہیں تاکہ اپنی پیشہ ورانہ اور ذاتی زندگی میں توازن قائم رکھ سکیں۔
ریچل نے بتایا کہ ان کے 12 سالہ بیٹے اور 11 سالہ بیٹی کے لیے ماں کی موجودگی بہت ضروری ہے۔ 2024 سے قبل، وہ دفتر کے قریب کرائے پر رہتی تھیں اور صرف ہفتے میں ایک بار اپنے بچوں سے ملنے گھر آتی تھیں، لیکن اس سے وہ اپنے بچوں کے ساتھ کم وقت گزار پاتی تھیں۔
سفر کی روٹین اور فوائد
اب ریچل صبح 4 بجے جاگتی ہیں، 5 بجے گھر سے نکلتی ہیں، اور 6:30 بجے کی پرواز سے کوالالمپور پہنچ جاتی ہیں۔ دفتر میں کام مکمل کرنے کے بعد وہ رات 8 بجے تک واپس پینانگ پہنچ جاتی ہیں، یوں روزانہ 400 کلومیٹر کا فضائی سفر طے کرتی ہیں۔
دلچسپ بات یہ ہے کہ اس تبدیلی سے ان کے ماہانہ اخراجات میں کمی آئی ہے۔ پہلے وہ کرائے اور دیگر اخراجات پر کم از کم 474 ڈالر خرچ کرتی تھیں، جبکہ اب ان کے سفری اخراجات کم ہو کر 316 ڈالر رہ گئے ہیں۔
ذہنی سکون اور خاندانی وقت
ریچل کا کہنا ہے کہ ہوائی سفر کے دوران وہ موسیقی سنتی ہیں اور قدرتی مناظر سے لطف اندوز ہوتی ہیں، جو ان کے لیے ذہنی سکون کا باعث بنتا ہے۔ اگرچہ روزانہ جلدی اٹھنا اور سفر کرنا مشقت طلب ہے، لیکن بچوں کے ساتھ وقت گزارنے کی خوشی ان کی ساری تھکن دور کر دیتی ہے۔
