بالی ووڈ کے سپر اسٹار شاہ رخ خان اور معروف ہدایتکارہ فرح خان ایک بار پھر ’میں ہوں نا 2‘ کے لیے اکٹھے ہو رہے ہیں۔ بھارتی میڈیا رپورٹس کے مطابق، یہ فلم 2004 میں ریلیز ہونے والی بلاک بسٹر ’میں ہوں ناں‘ کا سیکوئل ہوگی۔
یہ فلم شاہ رخ خان اور ان کی اہلیہ گوری خان کے بینر ’ریڈ چلیز انٹرٹینمنٹ‘ کے تحت بننے والی پہلی فلم تھی، جس کی وجہ سے اس کا شاہ رخ اور فرح خان کے لیے ایک خاص مقام ہے۔
فلم کا منفرد آئیڈیا
ذرائع کے مطابق، فرح خان نے فلم کے سیکوئل کے لیے ایک منفرد کہانی تیار کی ہے، جو شاہ رخ خان کو بھی بےحد پسند آئی۔ اس وقت فرح خان اپنے رائٹرز کے ساتھ اسکرین پلے پر کام کر رہی ہیں اور ریڈ چلیز انٹرٹینمنٹ کی ٹیم بھی اس عمل میں شامل ہے۔
شاہ رخ خان کا کہنا ہے کہ وہ کسی بھی فلم کا سیکوئل صرف بنانے کے لیے نہیں کرنا چاہتے، بلکہ وہ ایک ایسی کہانی چاہتے ہیں جو پہلے حصے سے زیادہ متاثر کن ہو۔
کب تک بنے گی فلم؟
رپورٹس کے مطابق، فلم کا پہلا اسکرپٹ ڈرافٹ 2025 کے وسط تک مکمل ہو جائے گا۔
’میں ہوں ناں‘ کی کامیابی
یاد رہے کہ 2004 میں ریلیز ہونے والی فلم ’میں ہوں ناں‘ نے شاندار کامیابی حاصل کی تھی اور کئی ایوارڈز بھی جیتے تھے۔ فلم کی کہانی، میوزک، ایکشن، اور جذباتی لمحات کو شائقین نے بےحد پسند کیا تھا۔
مداحوں کا جوش
’میں ہوں ناں 2‘ کی خبروں کے بعد مداحوں میں جوش و خروش بڑھ گیا ہے، اور سوشل میڈیا پر اس سیکوئل کے حوالے سے زبردست ردعمل دیکھنے کو مل رہا ہے۔
