راولپنڈی۔9 مئی سے متعلق جی ایچ کیو حملہ کیس میں سابق وفاقی وزیر شیری مزاری سمیت 9 ملزمان پر فرد جرم عائد کردی گئی
اس کے علاوہ کیس میں پی ٹی آئی کے سینئررہنما اور سابق وزیر خارجہ شاہ محمود قریشی کو اڈیالہ جیل پہنچا دیا گیا تاہم ان پر فرد جرم عائد کرنے کی کارروائی مو¿خر کردی گئی۔
سانحہ 9 مئی سے راولپنڈی کی انسداد دہشت گردی عدالت میں 14 مقدمات کی سماعت ہوئی، جج امجد علی شاہ نے اڈیالہ جیل میں مقدمات کی سماعت کی۔
کارروائی کے دوران تمام کیسوں میں ملزمان کی حاضری لگائی گئی اور اس کےبعد عدالت نے 9 مئی کے 13 مقدمات کی سماعت 6 جنوری تک ملتوی کردی۔
اس کے علاوہ جی ایچ کیو حملہ سے متعلق ایک اور مقدمے کی سماعت ہوئی، سابق وفاقی وزیر داخلہ شیخ رشید احمد، سابق وفاقی وزیر انسانی حقوق شیری مزاری، سابق وزیر قانون پنجاب راجہ بشارت کے علاوہ دیگر ملزمان انسداد دہشت گردی عدالت پہنچے۔
کیس کی سماعت کے سلسلے میں شاہ محمود قریشی کو اڈیالہ جیل پہنچا دیا گیا، بانی پی ٹی آئی عمران خان کو بھی کمرہ عدالت میں پیش کیا گیا۔
وزیر اعلیٰ خیبر پختونخوا علی امین گنڈاپور سمیت 23 ملزمان کی کی مسلسل غیر حاضری پر استغاثہ نے ضمانت منسوخی کی درخواست دائر کردی۔
سماعت کے دوران عدالت نے شیری مزاری سمیت 9 ملزمان پر فرد جرم عائد کی جب کہ انہوں نے صحت جرم سے انکار کیا۔
عدالت نے تمام ملزمان کو نوٹس جاری کرتے ہوئے کیس کی مزید سماعت 19 دسمبر تک ملتوی کردی۔
