اسلام آباد کی انسداد دہشت گردی عدالت نے پاکستان تحریک انصاف (پی ٹی آئی) کے گرفتار ارکان قومی اسمبلی کی ضمانت منظور کرلی ہے۔
عدالت نے پی ٹی آئی کے تمام ارکان قومی اسمبلی کی ضمانت 30،30 ہزار روپے مچلکوں کے عوض منظور کرتے ہوئے انہیں فوراً رہا کرنے کا حکم دیا۔
یہ ضمانت کی درخواستیں انسداد دہشت گردی عدالت کے جج ابو الحسنات محمد ذولقرنین نے سماعت کیں۔ پراسیکیوٹر نے عدالت کو بتایا کہ ایم این اے احمد چٹھہ مقدمے میں نامزد ہیں اور مقدمے میں شامل دفعات کی سزا کم سے کم تین سال ہے، اس لیے ضمانت منظور نہیں کی جانی چاہیے۔ جج ابو الحسنات نے استفسار کیا کہ شیر افضل مروت، احمد چٹھہ اور دیگر ارکان قومی اسمبلی کے خلاف کچھ برآمد ہوا ہے؟ جس پر پراسیکیوٹر نے جواب دیا کہ کوئی چیز برآمد نہیں ہوئی۔
گرفتار پی ٹی آئی کے ارکان قومی اسمبلی میں شیر افضل مروت، شیخ وقاص، احمد چٹھہ، عامر ڈوگر، یوسف خان، نعیم علی شاہ، اویس حیدر جکھڑ، شاہ احد اور زبیر خان شامل ہیں۔ پی ٹی آئی ایم این ایز پر تھانہ سنگجانی، ترنول، نون اور تھانہ سنبل میں دہشت گردی کی دفعات کے تحت مقدمات درج ہیں۔