کراچی — پاکستان اور بھارت میں اپنے اداکاری کے جوہر دکھانے والی معروف اداکارہ مدیحہ امام نے اپنی شادی سے متعلق ایک اہم تفصیل شیئر کی ہے۔ مدیحہ امام نے دو ماہ قبل پاکستانی میگزین کو ایک خصوصی انٹرویو دیا تھا جس میں انہوں نے اپنے کیریئر اور شوہر موجی بسر کے بارے میں تفصیل سے بات کی۔
اداکارہ نے شادی کے حوالے سے بتایا کہ ان کے شوہر کا تعلق بھارت کے اروناچل پردیش سے ہے، لیکن ان کی شادی دبئی میں ہوئی تھی جہاں ان کے والدین شرکت نہیں کر سکے۔ مدیحہ نے وضاحت کی کہ جب ان کی شادی کی تاریخ مقرر ہوئی، تو ان کے والد ٹریفک حادثے کا شکار ہو گئے، جس کی وجہ سے ان کی والدہ بھی نکاح میں شامل نہیں ہو سکیں۔ نتیجتاً، ان کی شادی بہنوں کی موجودگی میں ہوئی جبکہ والدین ویڈیو کال کے ذریعے نکاح میں شریک ہوئے۔
مدیحہ امام نے مزید بتایا کہ ان کے ولیمے کو والد کی مکمل صحتیابی تک ملتوی کر دیا گیا تھا اور نکاح کے 4 ماہ بعد دبئی میں ولیمہ منعقد کیا گیا۔ اداکارہ نے اپنے شوہر اور اپنی عمر کے فرق کے بارے میں کہا کہ ان کے شوہر موجی بسر ان سے ساڑھے چار سال چھوٹے ہیں، اور عمر کے فرق کی وجہ سے ان کی سوچ میں بھی فرق ہے، لیکن انہیں یقین ہے کہ وقت کے ساتھ یہ فرق ختم ہو جائے گا۔
انہوں نے کہا کہ جب موجی نے انہیں شادی کے لیے پروپوز کیا تھا، تو ان کی عمر 31 سال تھی، اور چونکہ دونوں شادی کے معاملے میں سنجیدہ تھے، انہوں نے فوراً ہاں کہہ دی تھی۔ واضح رہے کہ مدیحہ امام نے 2023 میں دبئی میں شادی کر کے سب کو حیران کن کر دیا تھا۔ ان کے شوہر موجی بسر بھارتی فلم میکر اور پروڈیوسر ہیں، جنہوں نے گریجویشن کے بعد 2017 میں اپنے بالی ووڈ کیریئر کا آغاز کیا اور ‘دی سک’ اور ‘لڈو چپّی’ جیسی مقبول فلموں میں اسسٹنٹ پروڈیوسر کے طور پر کام کیا۔