بھارت کا مقبول کرائم ڈرامہ سیریل “سی آئی ڈی” چھ سال کے طویل وقفے کے بعد ایک بار پھر اسکرین پر واپسی کے لیے تیار ہے۔ بھارتی میڈیا کے مطابق، اس ڈرامے کے میکرز نے انسٹاگرام پر ایک ویڈیو شیئر کی ہے، جس میں شوٹنگ کے دوران کے مناظر دکھائے گئے ہیں۔ رپورٹ میں بتایا گیا ہے کہ شو کی ریکارڈنگ 22 نومبر کو کاسٹ اور عملے کی موجودگی میں مہورت پوجا کے ساتھ شروع کی گئی ہے۔
“سی آئی ڈی” دوبارہ سونی انٹرٹینمنٹ ٹیلی ویژن پر نشر ہوگا، جہاں سے یہ چھ سال پہلے ختم ہوا تھا۔ مداحوں میں اس ڈرامے کی واپسی کی خبر پر خوشی کی لہر دوڑ گئی ہے، اور وہ بے حد پرجوش ہیں کہ ان کا پسندیدہ شو ایک بار پھر اسکرین پر نظر آئے گا۔
نئے سیزن میں پرانی کاسٹ کی واپسی ہوئی ہے، جن میں شیواجی ستم (اے سی پی پردیومن) اور آدتیہ سریواستو (انسپکٹر ابھیجیت) اپنے مخصوص کرداروں میں نظر آئیں گے۔ میکرز، اداکار اور چینل انتظامیہ ایکشن سے بھرپور سیزن کی تیاری میں مصروف ہیں، حالانکہ ابھی تک پہلی قسط کی ریلیز کی تاریخ کا اعلان نہیں کیا گیا۔ تاہم، ڈرامے کا پریمیئر ممکنہ طور پر کرسمس 2024 کے قریب متوقع ہے۔
25 اکتوبر کو جاری کیے گئے پرومو نے مداحوں کی دلچسپی میں مزید اضافہ کیا، جس میں دکھایا گیا کہ ابھیجیت نے کسی پر گولی چلائی ہے، جس سے نئی قسطوں کی مزید توقعات بڑھ گئیں ہیں۔
یاد رہے کہ “سی آئی ڈی” جنوری 1998 سے اکتوبر 2018 تک سونی ٹی وی پر نشر ہوتا رہا تھا، تاہم چینل انتظامیہ اور ڈائریکٹر کے درمیان اختلافات کی وجہ سے اسے اچانک بند کر دیا گیا تھا۔ اس کے بعد سے مداح اس پروگرام کی واپسی کے منتظر تھے، اور اب آخرکار ان کی خواہش پوری ہوتی نظر آ رہی ہے۔
