ملتان ٹیسٹ جیتنے پر محسن نقوی کی ٹیم کو مبارکباد

چیئرمین پاکستان کرکٹ بورڈ (پی سی بی) محسن نقوی نے انگلینڈ کے خلاف ملتان ٹیسٹ جیتنے پر پاکستانی ٹیم کو مبارکباد دی ہے۔

ملتان اسٹیڈیم میں کھیلے گئے سیریز کے دوسرے ٹیسٹ میچ میں قومی ٹیم اور مینجمنٹ کے نام اپنے تہنیتی پیغام میں محسن نقوی نے پاکستانی ٹیم کی شاندار کارکردگی کو سراہا۔ انہوں نے خاص طور پر ساجد خان اور نعمان علی کی بالنگ کا ذکر کرتے ہوئے کہا کہ ان دونوں نے فتح میں اہم کردار ادا کیا۔

کامران غلام نے پہلے ہی میچ میں سنچری اسکور کر کے اپنی بھرپور صلاحیتوں کا مظاہرہ کیا۔

محسن نقوی نے کہا کہ طویل عرصے کے بعد ہوم ٹیسٹ میچ میں کامیابی ٹیم ورک کا نتیجہ ہے، جس میں محنت، جذبے اور پروفیشنل اپروچ کے ساتھ کھیلا گیا۔ انہوں نے نئے کھلاڑیوں کی سلیکشن کو بھی سراہتے ہوئے امید ظاہر کی کہ انگلینڈ کے خلاف آخری ٹیسٹ میچ میں بھی ٹیم بہترین کارکردگی دکھائے گی اور سیریز اپنے نام کرے گی۔