بالی ووڈ کے میگا اسٹار شاہ رخ خان ممبئی ائیرپورٹ پر ایک خاتون فین کے دھکے سے گرتے گرتے بچ گئے۔
بھارتی میڈیا رپورٹس کے مطابق، شاہ رخ خان ابوظہبی جانے کے لیے ائیرپورٹ پہنچے تو مداحوں نے انہیں گھیر لیا اور ان کے حق میں نعرے لگائے۔ جب شاہ رخ اپنی گاڑی سے اترے، تو مداحوں نے قریب آ کر تصویریں اور ویڈیوز بنانے کی کوشش کی۔
شاہ رخ خان کے سیکورٹی گارڈز نے انہیں محفوظ رکھنے کے لیے گھیرا بنا لیا، لیکن ایک خاتون فین سب کو پیچھے دھکیل کر ان کے قریب پہنچنے میں کامیاب ہوگئی۔ رش اور خاتون کے دھکے کی وجہ سے شاہ رخ خان توازن کھو بیٹھے، لیکن انہوں نے فوری طور پر خود کو سنبھال لیا اور گرنے سے بچ گئے۔
اس واقعے کی ویڈیو سوشل میڈیا پر وائرل ہوگئی ہے۔ کچھ صارفین نے اسے خوف زدہ کن تجربہ قرار دیا، جبکہ دیگر نے یہ بات اٹھائی کہ مداحوں کو اسٹارز کی سلامتی اور ان کی پرائیویسی کا خیال رکھنا چاہیے۔
